Аталыкты коршалавшы куьни алдында Ногай районында орынласкан аьскер боьлигининъ куллыкшыларын байрам ман кутлав ийги аьдетке кирген. Быйыл да аьскер боьлигине район администрациясынынъ ваькиллери бардылар. Шатлыклы шарада конаклар «Ногайский район» МР администрациясынынъ аькимбасынынъ орынбасары Баймагомед Ярлыкапов, Афган согысынынъ катнасувшысы Мурат Мамутов, Ногай район Хатын-кызлар советининъ председатели Асият Манкаева, Терекли Мектеб авыл администрациясынынъ специалисти Марина Мурзагишиева катнастылар.

Шарады аьскер боьлигининъ командирининъ куллыгын кесек заманга юритуьвши Семен Сафронов ашты. Сонъ келген конаклар Аталыкты коршалавшыларга разылык соьзлерин караттылар. Олар аьскершилерге ден савлык, ийги службады йорадылар. Мунда согыс спецоперациясынынъ катнасувшылары, бизим баьтирлер акында коьп ийги соьзлер айтылды. Олар оьзлерин аямай, каты яв – нацизм мен куьрес юритедилер.
Шарада уьйкен оьктемлик пен бизим ердесимиз, СВО катнасувшысы Джавад Мамутов акында айттылар. Ол оьзининъ ракета расчеты ман караклардынъ оперативлик-тактический куьплерининъ 7 штабын, бир согыс аэродромын эм 3 ПВО системасын йок эткен. Уьйкен кайгырув ман Эли уьшин ян бергенлерди эслерине алдылар.
Сонъ конаклар эм согыс аьрекетшилер алдына Ногай районынынъ Халк яратувшылык орталыгынынъ эм «Айланай» ансамблининъ артистлери, «Карлыгаш» балалар ансамбли шыктылар. Солай ок бу куьн аьскершилер уьшин «Ногайский район» МР администрациясынынъ эм Терекли-Мектеб авыл администрациясынынъ атыннан берекетли сыпыра курылды. Аьскершилер болса, байрам шарасын уйгынлавшыларга савболсынын айттылар.
Н.Эрежепова.