Ногай район администрациясында кезекли аппарат йыйыны болып оьтти. Йыйынды баслаятып, район администрациясынынъ аькимбасы Мухтарбий Аджеков, янъыларда болып оьткен 1-нши Савлайроссиялык ногай атлылар юриси эм Халклар ара балаларды коршалав куьнин уйгынлав эм озгарув ман байланыста, бир неше йолдасларга грамоталар ман разылык хатлар тапшырды.
Савгаланганлардынъ ишинде ногай атлылар юрисин информация ягыннан канагатлавга уьйкен коьмегин эткен Карашай-Шеркеш Республикасынынъ Черкесск каласыннан журналист, шаир Асан Найманов, атлар юрисин уйгынлавшылардынъ бириси Рустам Атангулов, Астек Янгазиев бар эдилер.
Район аькимбасы Халклар ара балаларды коршалав куьнинде ра- йон орталыгында айырым шараларды йогары дережеде уйгынлаганлары уьшин Терекли-Мектеб авылдынъ Кадрия атындагы орта мектебининъ директоры Альфия Акимовага, патшалык «Айланай» фольклор-этнографиялык ансамблининъ етекшиси Мурат Ваисовка грамоталар берди.
Мухтарбий Аджеков оьзининъ соьзинде туьнегуьн районга ДР маданият министрининъ 1-нши орынбасары келип, Куьнбатар авылына барганы акында хабарлады. Онынъ билдируьвине коьре, тезден авылда янъы маданият уьйининъ меканы курылып басланады. Бу куллыкты подрядчиклер быйыл ок та кутармага соьз бергенлер.
Муннан сонъ Ногай ЦРБ бас врачынынъ эмлев бойынша орынбасары Зафира Куруптурсунова Ногай ра- йоны бойынша коронавирус юкпалы маразына карсы вакцинациялав куллыгы акында хабарлады.
Онынъ айтувы ман, быйылдынъ 7-нши июнине Ногай ЦРБ-сына Гам-Ковид-Вак вакцинасынынъ 2000 ампуласы эм ЭпиВакКорона вакцинасынынъ 50 ампуласы аькелинген. Район бойынша 10472 аьдемге вакцина урылмага тийисли.
– Буьгуьнге район бойынша баьриси вакцинадынъ бириншиси 1450 аьдемге сугылган. Толы кебинде вакцинадынъ биринши эм экиншиси 899 аьдемге урылган. Узактагы авылларда яшайтаган аьдемлерге вакцина сугув соравы маьселе болып калады. Соларга вакциналарды еткеруьв уьшин ерлеринде сувытувшы алатлар сатып алув керегеди, – деди З.Куруптурсунова.
Йыйында Мухтарбий Аджеков Ногай ЦРБ-сына бу куллыкты юриткени уьшин разылык билдирди, онынъ айтувы ман, район вакцинация яктан республика бойынша бас деп кери калатаганлардынъ санында эди, ызгы заманларда 3-нши орынга шыккан. Болса да, сабырланмага аьли де эрте, куьзге дейим район яшавшыларынынъ хыйлысы коронавируска карсы вакцина суктырмага тийисли.
Муннан сонъ йыйында Ногай район ерлеринде шегерткиге карсы куллыктынъ юриси акында район Авыл хозяйство управлениесининъ специалисти Али Баймурзаев билдируьв этти.
Йыйыннынъ тамамында «Шоьл тавысы» республикалык газетасынынъ боьлик редакторы Магомет-Али Ханов ана тилиндеги ерли газетага язылув исине демевлик этетаганы уьшин район аькимбасы Мухтарбий Аджековка редакция атыннан разылык билдирди, айдынъ ызына дейим язылмай калган коллективлер эм аьдемлер газетага языларлар деген сенимин айтты. Ана тилинде баспаланатаган газеталарга эм журналларга язылув акында оьз ойы ман Черкесскте шыгатаган «Маьметекей» журналынынъ бас редакторы Асан Найманов та боьлисти.
Бизим хабаршы.
