Йыл сайын оьтетаган «Кишкей йигитлердинъ форумы» Россиядынъ 12 регионларыннан 25 балалар «Яс баьтири» деген медали мен савгаландылар. Солардынъ арасында КЧР Ногай районынынъ Кызыл-Тогай авылыннан сакат аьдемди янып турган уьйден аман-эсен куткарган молодогвардеец Арслан Сеитов та бар эди. Сол куьн Арслан орамга шыкканда авылдастынъ уьйи янып турганын коьреди. Ол тез аьрекетлеп уьйге шапты, неге десе онда юрип болмайтаган сакат аьдем бар экенин билетаган эди.
Азбардынъ эсиги киртли экенин коьрип, азбардан атылып кирип, уьйден коркынышсыз ерге колына коьтерип, сакат аьдемди шыгарды.
«Молодая Гвардия Единой России» регионаллык боьлигининъ кабыл этуьви мен ол Москва каласына Аталыктынъ Баьтирлери куьнине багысланып, «Яс баьтир» деген медали мен савгаланувга шакырылды. Савгаларды «Молодая Гвардия» председатели Антон Демидов, «Единая Россия» Генсоветининъ секретарининъ орынбасары Анна Кузнецова, Россия Федерациясынынъ Баьтири, сенатор Александр Карелин тапшырдылар.
– Оьзлерининъ ясларына да карамастан, ясларымыз, кайбирде уьйкен аьдем де этип болмастай шынты йигитлик ислерин коьрсетип келедилер. Сондай маьнели аьлде олар оьзлерин колга алып, коркынышсызлык, йигерлик коьрсетип, авыр аьлде болган аьдемлерге оьз ярдамын эткенлер. Олардынъ аьр кайсысы да шынты Баьтир атын тийислисинше юритпеге ыхтыяры бар, – деп белгиледи А.Демидов.
Белгилеп озайык, «Молодая Гвардия Единой России» яс несил белгиленген ваькиллерине эки айырым савгаларын токтастырган.
Бириншиси – «Яс баьтири» оьз ясына да карамастан, баьтирлик йигитликлерин эткен эм аьдемлердинъ яшавларын куткарган балаларга эм оьспирлерге тапшырылады.
Экинши савга – «Бизим заманымыздынъ баьтири» деген омырав белгиси – ол илми, саният, спорт тармакларында, ямагат аьрекетлеринде эм сондай баска тармакларда маьнели етимислерине етискен яс россияншыларына тапшырылатаган савга болады.
Суьвретте: Арслан Сеитов.