Ногай район администрациясынынъ кезекли кенъесинде эки маьнели сорав ортага салынып ойласылган.
Аьдетке коьре, шара савгалавдан басланды. Ра- йон аькимбасы Джамалутдин Эсиргепов регионлар ара эркин куьрес бойынша «Шоьл баьтирлери» турнирин оьткеруьвде белсенли катнасканы уьшин «Карлыгашлар» балалар хореографиялык ансамблининъ оьнер етекшиси Альмира Тунгатаровага, солай ок миллет кийимлерининъ республикалык фестивалинде уьстинликли ортакшылык эткени уьшин район администрациясынынъ бас специалисти Руслан Аджибаевке Разылык хатлар тапшырды.

Кенъестинъ биринши соравы – Ногай районынынъ эки: Орта-Тоьбе эм Терекли-Мектеб авылларынынъ участок сайлав комиссияларынынъ 10-11-нши сентябрьде келип турган сайлавларга аьзирлиги акында соравды ойласаяктан алдын ра- йон етекшиси бу сайлавлар тийисли аьлде, бузувларсыз оьтпеге керегине айырым эс эттирди. «Баскалай, – деди Джамалутдин Эсиргепов, – ызгы йылларда бизим район туьсип калган «сайлавлар шукырыннан» бизге шыкпага бек кыйын болаяк. Сога коьре, аьр бир яваплы аьдем, тавыславлар оьтеек авыллардынъ аькимбаслары сайлав кампаниясы дурыс кепте, законлы йорыгы ман оьтуьви уьшин каьр шекпеге керек».

Кенъестинъ биринши соравы бойынша шыгып соьйлеген Ногай территориаллык сайлав комиссиясынынъ председатели Мурзабек Бальгишиев 10-11-нши сентябрь куьнлеринде сав элдегиндей эм республикадагындай болып, Ногай районында да, олай дегени, Терекли-Мектеб авылдынъ 7-нши сайлав участогында эм Орта-Тоьбе авылдынъ 10-ншы сайлав участогында ерли авыл Депутатлар йыйынларына депутатларга кандидатларды сайлавлар оьткерилеегин билдирди. Районда бу тавыславларда «Единая Россия» эм «Справедливая Россия – За правду» политикалык партияларынынъ кандидатлары да катнасаяклар. Районнынъ ТИК етекшисининъ соьзине коьре, эки де сайлав участоклары тавыславларга аьзир. Керек шаклы бюллетеньлер, сайлавшылар списоклары аьзир этилинген, сакатлар эм савлыгы бойынша сайлав участокларына келип болмаяк яшавшылар уьшин уьйлерине сайлав ящиклерин еткеруьв ниет пен маршрутлар туьзилген. Участок сайлав комиссиялары ерли-еринде ислеп баслаганлар. Эки сайлав участоклары да керек шаклы маскалар, антисептиклер мен канагатлаган.
Кенъестинъ экинши соравы – быйылдынъ 8 айы ишинде «сельсовет Коктюбинский» СП МО социал-экономикалык оьрленуьви бойынша юриткен куллыгы акында сонынъ аькимбасы Замир Суюндиков шыгып соьйледи.
Бизим хабаршы.