Сентябрь айынынъ 5-нен 8-не дейим Дагестан Аькимбасы Сергей Меликов Владивосток каласында оьткен Куьнтувар экономикалык форумында ортакшылады. Онда кенъеслер эм тоьгерек столлар озгарылув ман субъектлер етекшилери эм федераллык экспертлери мен элимиздинъ экономикасынынъ оьрленуьв соравлары ойласылды.
Сергей Меликов аьлиги аьллерде миллет туристлик индустриясынынъ оьрленуьв соравларына багысланып оьткен семинар-кенъесте катнасты, семинардынъ мастер-планлавга эм инфраструктурага багысланган тоьгерек столлардынъ бирисин озгарды. Солай ок ол пленарлык сессияда да ортакшылык этти.
Белгилеп озайык, Куьнтувар экономикалык форум (ВЭФ) – 2015-нши йылдан алып Владивостокта оьтетаган уьйкен россиялык халклар ара майданлардынъ бириси.
Форумда савлай Россиядынъ эм айырым Узак Куьнтувар регионынынъ оьрленуьв перспективалары, баска эллер мен биргелес аьрекет этуьвди кенъейтуьв соравлары ортага салынып ойласылды, биргелес проектлер кабыл этилинип алынды, бир неше уьйкен контрактларга кол басылып беркитилди.
Аьдеттегидей, шара шет эллер партнерларын да кызыксындырды: онда 60 эллердинъ, сонынъ ишинде Китай, Япония, Индия, Кубыла Корея ваькиллери ортакшылык эттилер. Доьрт куьнлер ишинде 70-тен артык пайдалы шаралар, тоьгерек столлар, эки як йолыгыслар болдылар.
РФ Президенти Владимир Путин форум уйгынлавшыларына эм катнасувшыларына каратылган соьзинде, Россия баьри кызыксынган эллер мен биргелес аьрекет этуьвди оьрлендирмеге аьзир экенин белгилеп, булай деди: «Бу йыл йолыгыстынъ бас темасы: «На пути к многополярному миру» – заманга келисли эм бек маьнели». Ол алдынгы эски йорык орынына дурыслык эм бирдей ыхтыярлык принциплерине негизленген янъы дуныя йорыгы келгенин, аьр эл эм халк оьз суверенли оьрленуьв йолын сайламага ыхтыяры барын белгиледи.
Россия Президенти Владимир Путин Дагестан Республикасынынъ Каспийде орынласкан «Каякент» курорт ерин кайтадан янъыртув керегин белгиледи.
Россия Президенти туризм бойынша Госсоветтинъ кенъесин озгарып туры. Кенъесте аьлиги заманда миллет туристлик индустриясын оьрлендируьв соравлары каралды. Ойласувда Дагестан Республикасынынъ Аькимбасы Сергей Меликов катнасты.
Россия Президенти Владимир Путин Сырт Кавказдынъ туристлик комплекслерининъ оьрленуьви йогары дережеде деп белгиледи. Сонынъ ишинде ол Каспийде «Каякент» курорт ери акында да айтты. Элимиздинъ басшысынынъ айтувына коьре, ол ийги курортлардынъ бириси болган.
Путин сол курортты кайтадан туьзуьв керек деген Дагестан Аькимбасы Сергей Меликовтынъ кенъесин хош коьрген.
