Озган юма, казан айынынъ 14-нши куьнинде, Махачкалада Дагестан Республикасынынъ Аькимбасы болып сайланган Сергей Меликовтынъ ис орынына туьсуьвине багысланган официаллык шатлыклы шарасы болып оьткен.
Бу йыйында РФ Федераллык Йыйынынынъ Федерация Советининъ Председателининъ Биринши орынбасары Андрей Яцкин, РФ Президентининъ Сырт-Кавказ Федераллык округындагы толы ыхтыярлы ваькили Юрий Чайка, баьри де Сырт Кавказ республикаларынынъ аькимбаслары, РФ Федерация Советининъ сенаторлары, РФ Государстволык Думасынынъ, ДР Халк Йыйынынынъ депутатлары эм баска коьп етекшилер эм конаклар катнастылар.
ДР Халк Йыйынынынъ Председатели Заур Аскендеров Дагестан Аькимбасы оьз ис орынында бес йыл куллык этееги акында республика парламентининъ токтасын окыды.
Аьдетке коьре, Сергей Меликов Дагестан халкына алал куллык этееги акында ант берди.
Янъы сайланган республика етекшисин Юрий Чайка кутлады.
«Бас ниет – аьр бир аьдемге оьз болымлыгын яшавга шыгарувга амаллар туьзуьв эм Дагестан Республикасында яшав сапатын арттырув. Сонынъ уьшин регионнынъ баьри анъсатлыклары да бар. Сизинъ бай яшав, кеспи сулыбынъыз алдыга салынган борышларды толтырувынъызда Сизге ийги негиз болар», – деди Юрий Чайка.
РФ Федерация Советининъ Председатели атыннан йиберилген саламын Андрей Яцкин окыды.
Муннан сонъ, бирининъ артыннан бири шыгып, Сергей Меликовты Шешен Республикасынынъ Аькимбасы Рамзан Кадыров, КЧР Аькимбасы Рашид Темрезов, КБР Аькимбасы Казбек Коков эм баскалар кутладылар.
Шарадынъ ызында Сергей Меликов шыгып соьйледи эм Дагестан Аькимбасы болув уллы сый эм йогары яваплылык деп белгиледи.
«Тап сондай анъламым ман мен бу трибунага шыкканман. Буьгуьн бу залдагы аьр ким де, сонынъ санында меним кандидатурам уьшин тавысларын берген Халк Йыйынынынъ депутатлары да соьйтип ойлайтаган болар деп сенемен. Ак юрегимнен Россия Президенти Владимир Путинге, РФ Президентининъ Сырт-Кавказ Федераллык округындагы толы ыхтыярлы ваькили Юрий Чайкага, «Единая Россия» партиясынынъ Генераллык советине, ДР Халк Йыйынынынъ, РФ Государстволык Думасынынъ депутатларына, сенаторларга, баьри дагестанлыларга разылыгымды билдиремен. Сол сенимди аклар уьшин оьзимнинъ баьри куьшимди де саларман», – деген Сергей Меликов.
