2006-ншы йылдынъ увыт айынынъ 16-ншы куьни. Ногай районынынъ Червленные Буруны авылынынъ яшавшылары – Акмурзаевлердинъ тукымына, олардынъ кардаш-тувганларына кайгылы куьн болып калды. Бу куьн тек авылдынъ тувыл, мектебтинъ йыл язбасына кирди… Соннан бери он алты йыл озып барады. Коьз алдымызга, биз – сол куьнди коьргенлерге, айлак сувык, аязлы куьн (соннан бери сондай сувыклык болмаган болса да ярайды), аяк астындагы кардынъ сеси де, янлыдай, шыгады. Червленные Буруны авылында аьдемлер яшамайтагандай тыныклык, сол тыныклыкты тек автоматлар сеси мен ийтлердинъ улувы бузады, авылга киретаган эм шыгатаган тек милиция автокоьликлери болмаса, баскасы йок.
Ногай районымыздынъ баска авылларынынъ яшавшылары орталык телеканалларынынъ янъылыкларын биревин де калдырмай карайдылар эм тынълайдылар. Таныс ерлерди коьруьв –кызыклы, ама атылган автоматлардынъ сеслери коркыныш тувдырады. Сол казалы эм кайгылы куьн Ногай районы бойынша Россия МВД-сынынъ Червленные Буруны авыл ериндеги боьлигининъ куллыкшысы Замир Махмуд увылы Акмурзаев, мектебке карап ювырган, балаларга шапкынлык этпеге суьйген караклардынъ алдын бувып, йигитлерше ян берген. Буьгуьнлерде сондай баа ман оьзининъ яшав оьмири мен аманласкан Замир Акмурзаевти мутпайды ис йолдаслары, халкы, тувган-оьскен авылдагы мектеб онынъ атын юритеди. Битпейди ана юрегиндеги ярасы…
Аьр йыл сайын аьдет болып, Замир Акмурзаевтинъ ян берген куьнинде Червленные Буруны авыл мектебинде 11-нши класс окувшылары ман «Эстелик конъыравы, мутылмаяксынъ» деп аталып, класс саьати эм баьтир ян берген ерде салынган эстеликтинъ касында линейка озгарылады, ызында эстеликке гуьллер салынадылар.
Бу йыл да аьдеттен таймай, Червленные Буруны авылына «Ногайский район» МР администрациясыннан эм Ногай районы бойынша Россия МВД боьлигининъ куллыкшылары конакка келдилер. Замир Акмурзаевтинъ эстелигине багысланган шарада онынъ ювыклары, барган конаклар эм авыл мектебининъ окытувшылар эм окувшылары ортакшылык эттилер. Бу куьн озгарылган класс саьатинде оьз эскеруьвлери мен Замирдинъ иниси Асхад Акмурзаев боьлисти, окувшылар ога багыслып язылган ятлавларын окыдылар, йыйылган конакларга Замир Акмурзаевтинъ туьрли йылларда туьскен суьвретлериннен аьзирленген видеоролик коьрсетилди. Сол йолыгыста Ногай районы бойынша Россия МВД ваькили, иш ислер бойынша службасынынъ подполковниги Руслан Кельдасов Замирдинъ атасына, сондай увылды тербиялап, оьстиргени уьшин оьз разылыгын билдирип, разылык хат пан акшалай савгады тапшырды. Оннан сонъ шара эстеликтинъ касына коьшти. Келген конаклар, окувшылар ман окытувшылар, баьриси де баьтирдинъ эстелигине гуьл байламларын салдылар. Келген конаклардан «Ногайский район» МР администрациясынынъ аькимбасынынъ орынбасары, АТК секретари Баймагомед Ярлыкапов, Руслан Кельдасов, Ветеранлар советининъ председатели Акманбет Сангишиев, мектеб директоры Эльдар Садыков, Червленные Буруны авыл етекшиси Марат Абдулжалиев, Замирдинъ атасы Махмуд, оьзлерининъ кайгырувларын билдирип, сондай баьтир йигит пен оьктемсийтаганларын, ясларга Замирдей йигитлерге тенъ болмага шалысувды йорап, оьз соьзлерин айтып кеттилер.
Таза аспанга ак туьсли шарларды йиберуьви мен шара тамамланды. Сонынъ бас тилеги – болмасын бир де казалы куьнлер эм согыслар. Болганнан сонъ, катнаскан, оьмирлери кыскарган йигитлеримиздинъ эткен баьтирликлери оьмирлерге эстелик болып калсын.
Г.Сагиндикова.
Суьвретлерде: эстеликтинъ касында оьткен шаралар.
