Медициналык сестра – сыйлы эм бурынгы кеспилердинъ бириси. Мынълаган йыллар артта яны авырыган хатынлар авырувлыларды караганлар, куьндегилик иси мен, колыннан келген коьмеги мен, коьтергишлеви мен оларга сав болмага ярдам эткенлер. Медсестра – ол энъ де баслап ян. Сога шайыт Флоренс Найтингейл, ол коьплеген йыллар артта Англияда медсестралар службасын туьзген. Онынъ тувган куьнинде – курал айдынъ 12-нши куьни – савлайдуныялык медсестралар байрамын беркиткенлер.
Аьлиги заманда медициналык сестра – кеспили специалист, ол эмлев эм авырувлыларды карав бойынша врачтынъ талаплавларын толтырады. Бу куллык тынышлардан тувыл, кайдай авырувлыларды да карамага туьседи медсестраларга эм медбратларга. Сондай сыйлы эм тыныш тувыл кеспидинъ иеси – Айгуль Даурбек кызы Эстувганова. Медсестра болып ол 17 йылдан бери куллык этеди. Куьнбатар авылында Айгуль Даурбек эм Мауе Эстувгановлардынъ аьелинде тувган. Мауе Сулейман кызы, эри дуныядан эрте кешип кеткеннен сонъ, Айгульди оьзи оьстирди, окытты. Ерли мектебти битирген сонъ, кызалак Кисловодск каласындагы медколлеждге туьсти. Окувын битирген сонъ, яс специалист Терекли-Мектеб авылында райбольницада терапия боьлигининъ медсестрасы болып ислейди. Буьгуьнлерде аьрекет эткен йыллары ишинде алган сулыбын, билимин кулланып, Айгуль Даурбек кызы авырувлыларды соьзи мен де, иси мен де эмлейди. Бу авылда аьел де курды Руслан Дуйсенбиев пен, олар эки бала тербиялайдылар. Кызы Аиза А-Х.Джанибеков атындагы мектебте 7-нши класста, увылы Марсель – 3-нши класста окыйдылар. Эри Руслан Уренгой каласында Газпромда монтажник болып куллык этеди.
– Аьр бир истинъ кыйынлыгы да, суьйиниши де бар. Меним бас борышым – аьдемлердинъ авырувын енъил этуьв, оларды эмлев. Аьдемлердинъ касиети туьрли болады, олардынъ тек авырыган ерин эмлеп калмай, аьдемшилик пен карамага керек болады, – деп хабарлайды Айгуль.
Коронавирус пандемиясы заманында бек кыйынлы эди. Сол заманда бизим медицина куллыкшылары уьйкен йигитлик коьрсеттилер. Сол куьнлерде ийги иси уьшин Айгуль Даурбек кызы ДР савлык саклав министри атыннан Разылык хатына тийисли болды. Соны ман бирге онынъ кайратлы аьрекети район администрациясынынъ, ислейтаган больницасынынъ етекшилеви мен белгиленген, Айгуль Эстувгановага коьплеген Сый грамоталар тапшырылган.
Курал айынынъ 12-нши куьнинде савлайдуныялык медсестралар куьни белгиленеди. Ак юректен сол сыйлы эм кыйынлы кеспиди байырлаган инсанларды кеспили байрам ман кутлап, баьри ийгиликлерди йораймыз.
Г.Бекмуратова.
Суьвретте: А.Эстувганова.