Янъыларда Махачкаладагы «Дагестан авылы» этнографиялык музей-заповеднигинде Сраждин Батыров атындагы саният мектебининъ окытувшысы, суьвретши Мархаба Шалиевадынъ «Кийгизимнинъ йылувы» деген выставкасы оьтти. Онынъ ашылувында ДР Халк Йыйынынынъ депутатлары, ДР авылхозяйство эм савда юритуьв министри Мухтарбий Аджеков, Дагестаннынъ Халк язувшысы Бийке Кулунчакова эм ДР Халк поэти Анварбек Култаев, солай ок Ногай район администрациясынынъ ваькиллери ортакшылык эттилер.
Шарады «Дагестан авылы» этнографиялык музей-заповеднигининъ генеральный директоры Зумруд Сулейманова ашты. Кутлав соьзлерин Ногай район администрациясынынъ аькимбасынынъ орынбасары Баймагомед Ярлыкапов, ДР Халк Йыйынынынъ депутатлары Мурзадин Авезов эм Гасан Османов, ДР Халк Йыйынынынъ миллет политика, ямагат эм дин биригуьвлер эм парламентлик байланыслар бойынша комитетининъ председатели Анатолий Карибов, ДР авыл хозяйство эм савда юритуьв министри Мухтарбий Аджеков, ДР Суьвретшилер союзынынъ председатели Курбанали Магомедов эм коьп баскалар айттылар. Сонъ йыйылганлар С.Батыров атындагы саниятлар мектебининъ домбырашыларынынъ ойнавы ман Яхъя Кудайбердиевтинъ «Тоьре саз» анъын тынъладылар.
Мархаба Шалиева байрамларда ногай термелерге тоьселген кийгизлердинъ, тетесининъ сандыгындагы куьмис билезиклердинъ, Ногай шоьлде тоьселген калшалар кимик оьскен туьрли туьсли шешекейлердинъ ярасыклыгына балалай сукланган. Халкымыздынъ саз алаты домбырадынъ ярасык анъы эм анасы кырга ошакка писирген оьтпектинъ даьми эм ийиси онынъ эсинде дайым да. Бу баьри зат та яс кыздынъ юрегиннен келеекте ясаяк суьвретлеринде орын тапты. Мархаба Шалиевадынъ суьвретлеринде Ногай шоьл янланады, онынъ ярасык туьслери, сеслери, ийислери, солай ок онда яшаган аьдемлер эм айванлар дуныясы сезиледи.
Бу куьнлерде этнографиялык музей-заповеднигинде суьвретшидинъ 40-ка ювык живопись эм графика ислери коьрсетилинген. Айтып озайык, Мархаба Шалиевадынъ ислерининъ бириси Турция Республикасында, Анкарада, Россия Посольствосында турады. Онынъ баска куллыклары Россия регионлары бойынша коьрсетилинген.
Суьвретшидинъ выставкасын 5-нши июньге дейим этнографиялык музей-заповеднигинде коьрмеге болаяксыз.
Н.Эрежепова.
Суьвретте: шарадан коьринис.
