«Россети» ПАО генераллык директоры Андрей Рюмин Дагестан Республикасына ис йорыгы ман келуьвинде регионнынъ тармаклы энергообъектлеринде болган.

Соларды караяктан алды Андрей Рюмин Дагестан Республикасынынъ Энергетика эм ЖКХ министри Манвел Мажонц пан ис йыйынын оьткерген. Сонынъ барысында тармакларды армаган оьрлентуьв эм регион яшавшыларын энергия ман канагатлав сапатын (сонынъ эсабында техприсоединение, «Россети» негизине шеттеги эм иесиз туратаган энергообъектлерин костырув соравларын да косып) арттырув бойынша биргелесип аьрекет этуьв ислери ойласылган.
Министерстводынъ етекшиси компания инфраструктурасы 35 кВ-га эм соннан да артык киловаттка, ызгы айлардагы колайсыз ава аьллерине йогары шыдамлыгы барлыгын белгилеген. Солай ок ол энергетиклерге йолыгатаган бузувларды, сонынъ эсабында уьшинши лицолар етекшилейтаган тармаклардагы бузувларды тайдырмага ярдамласатаганы уьшин разылыгын билдирген.
Йолыгыстан сонъ Андрей Рюмин Махачкала ювыгындагы бир неше авыллардынъ электротармак инфраструктурасын карап шыккан.