Янъыларда «Ногайский район» МР аькимбасы М.Аджековтынъ етекшилеви астында ерли Терроризмге карсы комиссиядынъ кенъеси озгарылды. Шарага район авыл поселениелер аькимбаслары эм билимлендируьв организациялардынъ ваькиллери шакырылган.

Кенъестинъ бас соравы – янъы окув йылы басланганда эм биринши сентябрь куьнине багысланган шараларда ямагат йорыкты эм кавыфсызлыкты аьжетсизлев. Бу сорав бойынша оьз доклады ман Ногай районы бойынша ОМВД полиция етекшисининъ орынбасары К.Махмудов шыгып соьйледи эм аьр бир билимлендируьв учреждение полиция куллыкшылары ман сакланаягы акында билдирди.

Терроризмге карсы кайдай куллыклар юритилетаганы эм билимлендируьв учреждениелеринде бу сорав бойынша кайдай амаллар алынганы акында ерли самоуправление органларынынъ тергев астында яде муниципальли байырлыкта туратаган объектлерди эм коьплесип аьдемлер туратаган ерлерди терактлардан эм баска кавыфлыктан коршалав бойынша ис куьбининъ председатели Баймагомед Амин улы Ярлыкапов айтты. Ол бу сорав бойынша етиспевликлерди де белгиледи. 2018-нши йылда етиспевликлерди тайдырув ниет пен район администрациясы ман 2018-2020-ншы йылларга «йол картасы» туьзилген. Сол картага коьре керекли шаралар оьткериледи – видеотергев камералар салынды, мектеблерде коралав азбарлар ярастырылады эм янъыдан салынды. Билимлендируьв учреждениелер тергелгенлер эм акт туьзилип, янъы окув йылга аьзир деп белгиленгенлер.
2-нши сентябрь куьнинде баьри мектеблер де оьз капыларын аштылар эм балаларды хош алдылар.
Солай ок кенъесте баска соравлар да каралдылар.

Шарады тамамлай келе, М.Аджеков «Ногайский ра- йон» МР-нда Терроризмге карсы комиссиядынъ эткен исин ийги деп белгилеп, аьли де алдыда куллыкты белсенлетуьв керегин айтты. Баьри соравлар бойынша карарлар алынды эм яваплы аьдемлер салынды.