Юмадынъ басланувы ман «Ногайский район» МР администрациясында йыйын болып озды. Йыйыннынъ барысында Ногай район администрациясынынъ аькимбасы Мухтарбий Аджеков янъыларда Челябинск областининъ Нагайбакский районында конакта, «Единая Россия» партиясынынъ 20 йыллык мерекесине багысланган съездинде болганы акында айтып озды.

Оннан баскалай, Мухтарбий Кошманбет увылы Аджеков Ногай район орталык больницасынынъ ваькили З.Куруптурсуновага янъыларда Дагестан Республикасынынъ савлык саклав министерствосы ман озгарылган бойсынмаслык сапат белгиси деген шарасында экинши орынды алганы уьшин Сый грамота тапшырды.
Бу куьн йосыгында йыйылганлар алдында оьз куллыгынынъ тамамларын ДР ГБУ «Ногайское райветуправление» етекшиси Кельдимурат Шамаров шыгып соьйледи, оннан баскалай, календарь бойынша белгиленетаган сакатлар куьнин озгарувга кайдай аьзирлик коьрилетаганы акында ДР ГБУ «Ногайский район» МО-сында КЦСОН етекшиси Гульфира Мавлимбердиевна Капитуллаева, яшавшыларды социаллык яктан коршалав фондынынъ етекшиси Мавлидин Сейпувович Бекбулатов, «Яслык» яслар орталыгынынъ кесек заманга етекшисининъ исин юритуьвши Абибулла Шамбилов, Ногай районы бойынша «Инсан» саваплык фондынынъ етекшиси Азиз Муллаев айтып кеттилер.
Ногай районымыз бойынша материаллык яктан коьмек керек аьеллер бары белгиленди эм сондай кыйын яшав аьллерге калганлардынъ яшавын ийгилендируьв уьшин биргелес куллык юритилмеге кереги акында Мухтарбий Аджеков айтып, аьр биримиз янымыздагы керексинген аьдемлерге маьне бермеге шакырув этти.
Г.Сагиндикова.