Енъуьв байрамы алдында, 5-нши майда, Ногай район орталыгы Терекли-Мектеб авылында Ф.Капельгородский атындагы парктагы кардаш камыры ювыгында Украинада специальли согыс операциясында катнасатаган район яшавшыларына сый этип эстелик белгиси ашылды.
Эстелик белгисин митингтинъ алдында Ногай район администрациясынынъ аькимбасы Джамалутдин Эсиргепов, район Ветеранлар советининъ председатели Акманбет Сангишиев эм СВО-да ян берген Бораншы авыл яшавшысы Алибек Шамсудиновтынъ атасы – Динибек Шамсудинов аштылар.
Митингти баслаятып, район етекшиси буьгуьн Ногай районынынъ тарихине тагы да бир мутылмас оьзгерис – специальли согыс операциясында ортакшылык эткен эм аьли де этип турган ердеслеримиздинъ эрлигин эм согыс данъкын шайытлайтаган эстелик белгисининъ ашылувы кирип турганын белгиледи. Онынъ айтувы ман, буьгуьнлерде ДНР, ЛНР, Запорожье эм Херсон областьлерининъ яшавшыларын коршалав ниет пен украин националистлерине карсы россия аьскерлери юритетаган СВО-да 60-тан артык район яслары да оьз канын-янын аямай катнасадылар. «Олардынъ ишинде йигитлерше янын берген Кайтарбий Елманбетов, Арифулла Байрамов, Алибек Шамсудинов, Вячеслав Максидов, Амирхан Мурзагельдиев, хабар-теберсиз йок болган Курбан Курбановтынъ алдында биз уьйкен муьсиревлик пен басларымызды иемиз. Биз оьктемли, Аталыгымыздынъ биринши буйырыгы ман ок бизим ердеслеримиз де оьз элин явдан саклавга коьтерилгенине. Сол себептен душпан бузгышланаягына, енъуьв бизики болаягына биз сенемиз!» – деди Д.Эсиргепов.
Оьзининъ соьзинде Ногай район Ветеранлар советининъ председатели Акманбет Сангишиев, бизим ясларымыз халкымыздынъ сыйын эм намысын тоьмен туьсирмей, оьз аьскершилик борышларын Украинада йигерли кепте толтыратаганлары ман биз оьктемсиймиз деп белгиледи. «Олардынъ коьбиси согыс орденлери эм медальлери мен савгаланганлар, биз сога да оьктемли», – деп билдирди А.Сангишиев.
Тарумов эм Ногай районларынынъ аьскер комиссары Александр Мельников юреги дертке толганлыктан эм шарадынъ коьнъилге тийген аьсери мен байланыста бир неше секундларга дейим соьзин баслаялмай турды. «Соьйлемеге авыр… Тек бир зат айткым келеди специальли согыс операциясында оьз борышларын толтырып турган ясларга дайым да уьйкен сый. Бизим Уллы Енъуьвимизге 78 йыл толып туры, ама заман, оькинишке, элимизди тагы да фашизм мен куьреске кайтарды. Болса да, оьткен согыстагындай болып, енъуьв бизики болаягына, душпан бузгышланаягына эм баьри ясларымыз да аман-эсен бизге кайтаякларына мен сенемен», – деди ол.
Ойы эм иштелиги яктан терен соьзин «Единая Россия» ВВП Ногай район боьлигининъ толтырувшы секретари Амирхан Межитов (онынъ да увылы Замир – СВО катнасувшысы) айтты. Ол бу ашылган эстелик СВО-дынъ тири эм ян берген катнасувшыларына багысланган, олардынъ эрлигине эм йигитлигине бас ийюв болады деп белгиледи.
«Согыс борышларын толтыраяткан россия солдатларында дуныяга янъы коьз карасы кепленеди эм олар аьли баскаша ойлайдылар. Бизим буьгуьнги борышымыз – олардынъ аьлиги заманда анъламы оьскенине тийисли болмага, оьсип келеяткан несиллерди патриотизм негизинде, Тувган Элге алал этип тербияламага, профессионаллар болмага эм коьпмиллетли Россия енъсин эм шешекейленсин деп колымыздан келген баьри затты да этпеге. Специальли согыс операциясы – ол гибрид согысынынъ кызувлы аьсери. Биз буьгуьнлерде увылларымыз соннан аман-эсен келсинлер эм эндигиден армаган сонда оьлгенлер болмасын деген тилек пен ятамыз эм турамыз. Согыстынъ кызувлы аьсери тезден кутылар эм енъуьв бизики болар деп сенемен. Болса да, неофашизм мен карсыласувымыз аьли уьшин битпеек. Соны енъуьв уьшин бизге баьри фронтлар бойынша тыпакласув эм бирлесуьв керегеди», – деди А.Межитов.
Солай ок СВО катнасувшысы, майор, дивизион командири Джамалутдин Отегеновтынъ анасы – Кайтархан Отегеновадынъ шыгып соьйлеви де юрекке тиймей болмады. Ол бу эстелик буьгуьнлерде согыстынъ алды сырасында турган ясларга, оларды шыдамсыз куьтип турган аналарына эм хатынларына да кереклигин белгиледи. «Эстелик бизим буьгуьнги оьсип келеяткан несилимизге де бек керек, олар сондай эрликтинъ эм данъклыктынъ уьлгилери негизинде тербияланмага тийисли», – деди ясларга каратып К.Отегенова.
Митингте ерли аьскер боьлигининъ командирининъ куллыгын юритуьвши Семен Сафронов, Алибек Шамсудиновтынъ атасы – Динибек Шамсудинов шыгып соьйледилер.
Митингтинъ ызында сонынъ катнасувшылары специальли согыс операциясында ян берген аьскерши-ердеслеримиздинъ эстелигине бас ийдилер эм янъы ашылган эстелик белгисине шешекейлер байламларын салдылар.
М.Юнусов.
Суьвретте: эстелик белгисининъ ашылувына багысланган шарада.
