Оьткен юмадынъ ызында район орталыгы Терекли-Мектебтинъ сырт эм орта бетлердеги ерлерди кокыстан тазалав бойынша коьлем аьдемлер катнасувы ман субботник озгарылды. Онынъ озгарылувы акында район админинистрациясы куьнибурын билдирген эди. Буьгуьнги шарада кайбир республикалык эм район организациялар куллыкшылары ортакшылык эттилер: айырым айтканда, муниципалитет етекшиси Джамалутдин Эсиргеповтынъ, администрация аькимбасынынъ биринши орынбасары Хамидулла Саитовтынъ, район Депутатлар йыйынынынъ председатели Рустам Байманбетовтынъ етекшилиги астында Ногай ЦРБ, ЦНТ, УСЗН, КСЦОН, Газпромнынъ ерли боьлигининъ куллыкшылары эм яратувшылык коллективлер.
Ушынын айтсак, ызгы субботниктен сонъ ярым йыл ишинде кокыс деген айлак коьп тасланып, бу участоклар айлак насланган эди. Оькинишке, аьлиге дейим кокысты йыюв уьшин полигон йок. А кокыс йыюв бойынша келисуьв туьзилген организация район еринде аьлиги дейим коьринмейди. Онынъ акында сорав неше кере де аппаратлык кенъеслеринде эм район Депутатлар йыйынларында ортага салынып эм ойласылып каралган.
Район етекшиси Д.Эсиргепов бу ортак субботникке шыккан баьрисине де оьз разылыгын билдирди, район яшавшыларына айыплав соьзин каратты.
– Терекли-Мектеб – ол савлай ногай халкынынъ маданият эм тарих орталыгы, ама буьгуьн яшавшылардынъ, законды тутпай, мунда кокысларын таслаганга, район орталыгы оьзининъ ыспайы кебин йояды. Уьйинде мал саклайтаганларга да соьзимди каратаман: юз йылдан артык турган Ф.Капельгородский атындагы парк ишинде мал отлатпага ярамайды, – деди ол «Шоьл тавысы» респуб- ликалык газетасынынъ корреспондентине.
Бир ок заманда сол куьн «Шоьл тавысы» республикалык газетасынынъ куллыкшылары Баьтирлер аллеясын эм Баьтирлер бюстлер тоьгерегин кокыс- тан тазаладылар.
Бизим хабаршы.