Ясуьйкенлерди карав – бу куьнлерде социаллык куллыкшысынынъ ис борышы болды. Бир отыз-кырк йыллар артта бу кеспидинъ болаягына да ынанув кыйын болгандыр. Яшав аьллери буьгуьнлерде тынышлардан тувыл, бирев де рахатлыкта яшамайды, баьри де, халк арасында айтылганлай, дуныя кашып, биз кувып, яшав оьмирди суьремиз. Яслар кырга кетип ис аьрекетти бардырадылар, ясуьйкенлер юрт багып, азбарда ялгыз яшайдылар, солай болганда, оьзек те, оларга коьмек те, карав да керек болады. Бу куьнлерде социаллык куллыкшылардынъ ясуьйкенлерге коьп коьмеклери тиеди. Олар ясуьйкенлерге уьйшиликте ярдамласадылар: ас-сувын асадылар, туькенлерге барып, баьри керекли затларын аькеледилер, газ, свет акшасын тоьлейдилер.
Сондай буйымларды толтыратаганлардынъ бириси Шарипат Заурбек кызы Байгазиева болады. Ол оьзининъ ис борышын намыслы толтыратаганлар саныннан, биз соны ол карайтаган аьдемлердинъ билдиретаган разылыкларыннан билемиз, бизим газетамыздынъ бетлеринде баспаланып шыккан.
Шарипат Заурбек кызы бу тармакта 15 йылга ювык заман ис аьрекетин бардырады.
– Баслапкы йылларда бир социаллык куллыкшыга доьрт ярдам керек аьдем берилетаган болган болса, бу куьнлерде бизим аьр биримизге тогыз ясуьйкенди, сакатларды карамага туьседи. Юмада эки кере барамыз. Сол ясуьйкенлер де бизди сагынышлы карап турадылар. Олардынъ уьйлери де, оьзлери де бизге айлак ювык та болып каладылар. Араларында бизди оьз балаларындай коьретаганлар да боладылар. Биз олар ман кайгыды да, суьйиништи де боьлисемиз, аьр бирисининъ ишки сезимлерин де билемиз. Баьримизге де белгили болганлай, ясуьйкен аьдемлер балалар ман тенълес болып каладылар. Олар кайдай яшав сулыбын алган болса да, коьзясларын да, суьйинишлерин де ясырмайдылар. Аьр биримиз де яшавдынъ сол шагына етпей калмаякпыз. Меним ойыма коьре, социаллык куллыкшысынынъ касиети юмсак болмага керек, языксынув онынъ бас касиети болса, онынъ куллыгы да оьрге барады, ол оьзине байланган аьдем мен тил де табады, ювыкласып та кетеди, – дейди Шарипат Заурбек кызы Байгазиева.
Онынъ айтатаган соьзлери мен мен де муькир боламан, ис борышыма коьре, «Ногайский район» МР администрациясындагы КЦСОН етекшиси Гульфира Мавлимберди кызы Капитуллаева ман хабарласувымда да эситкенмен. Онынъ айтувына эм талаплавына коьре, социаллык куллыкшысынынъ бас борышы эм касиети – языксынув.
Бу куьнлерде социаллык куллыкшысынынъ кесписи энъ кереклилер ишине киреди. Мага коьре де солай, ясуьйкенлеримизге де карав, ясларга да келеектегиди ойлап, ислемеге керек.
Оьзлерининъ кеспи байрамын йылы йолыктылар социаллык куллыкшылар. Бу куьн Шарипат Заурбек кызы карайтаган аьдемлердинъ разылыгы ога уьйкен савга. Олар Шарипат Байгазиевага этетаган ис аьрекети уьшин савбол айтадылар. Сол тувылма абырай деген, эгер этетаган исинъ бааланса.
Г.Курганова.
Суьвретте: Ш.Байгазиева оьзи карайтаган М.Мамаева ман.
