Уллы Аталык согысы йылларында аьр биревдинъ эткен йигитлиги бизим юреклерде дайым болмага керек: оьлимге коркынышсыз карап барган аьскершидинъ, куьндиз эм кеше демей, эгинлерде эм заводларда ислеген тыл куллыкшыларынынъ эм уьйкенлер мен бирдей болып ислеген балалардынъ. Бизим киели борышымыз сол авыр йыллардагы акыйкатлыкты сакламага эм несилден- несилге коьширмеге.
Уллы Енъуьвдинъ 77-нши йыллыгынынъ сыйына, Ногай район Хатын-кызлар совети Билимлендируьв управлениеси мен биргелес «Согыстынъ йоллары ман» деген шара уйгынлады. Ол А.Джанибеков атындагы мектебининъ уьлке танув музейинде онынъ сондай кружогынынъ, Карагас авыл мектебиндеги ТОКС республикалык козгалысынынъ эм «Хранители Родины» излев отрядынынъ катнасувшыларынынъ ортакшылык этуьви мен оьтти. Бу куьн мунда конакка сыйлы ветеранлардынъ кызлары эм уныклары шакырылды. Бас деп келген конакларды А.Джанибеков атындагы мектебининъ етекшиси Курасхан Ярикбаева эм мектеб уьлке танув музейининъ етекшиси Альфия Саитова хошладылар. Курасхан Джумагельдиевна Украина спецоперациясынынъ катнасувшысы, А.Джанибеков атындагы мектебининъ выпускниги Джавад Мамутовтынъ эткен йигитлиги акында йыйылганлар ман оьктемсуьви мен боьлисти. Сонъ район Хатын-кызлар советининъ председатели Асият Манкаева балаларга согыс йылларда яп-яс кызлар, солардынъ сырасында онынъ анасы да, йигитлик этип, Ногай районына узак ерден келип, окытувшы болып ислегенлери, солай ок согыстан кайтып ветеранлар Ногай районынынъ экономикасын тургыстув уьстинде ислегени акында кызыклы хабарлады. Ол, бу куьн Украинада болып турган ислердинъ акында айта берип, узактагы 1941-1945-нши йылларда нацистлер мен куьресуьвде атайларынынъ йигитликлерин бу куьнлерде Украина еринде уныклары эм немерелери кайтарып этетаганын белгиледи, тез арада Украинада спецоперация тамамланып, бизим аьскершилер енъуьв мен аман-эсен уьйлерине кайтканын йорады.
Йолыгыс барысында эки школадынъ окувшылары Терекли-Мектеб эм Карагас авылларында яшаган ветеранлардынъ согыс йоллары, хатынлардынъ тылда эткен йигитлиги акында хабарладылар. Ветеранлардынъ эткен йигитлигине балалардынъ юрегиндеги уьйкен сый олардынъ тавысында, коьзлеринде аян сезилди. Балалардан сонъ йыйылганлардынъ юрегинде коьп заманга сакланар хабарды Карагас авыл мектебининъ ана тил эм адабиат окытувшысы, ТОКС эм тарихши-краеведлер биригуьвлерининъ етекшиси Нурсият Зарманбетова айтты, оьзининъ аьр бир окувшысынынъ етискен уьстинликлерин белгиледи: балалар сырасында республикалык конкурсларынынъ енъуьвшилери де, окувында уьстинликлерге етискенлер де аз тувыл эди.
Келген конаклар согыс ветераны Зармуханбет Биймурзаевтинъ кызы Зухра Байманбетова эм уныгы Зарема Оразбаева балаларга оьз аьелининъ баьтири акында айттылар.
Балалар атыннан А.Джанибеков атындагы мектебининъ уьлке танув кружогынынъ катнасувшысы Алина Шугаипова шыгып соьйледи.
Озгансыз келеекке абыт алынып болмайды. Элимиздинъ, Уллы Аталык согысынынъ тарихин яс несил саклайды, сога коьре биз «Келеектегимиз сенимли колларда» – деп йигерли кепте айтпага боламыз.
Н.Кожаева.
Суьвретте: йолыгыс барысында.
