Караша айынынъ 26-ншы куьнинде биринши кеспили ногай суьвретшиси Сраждин Батыровтынъ выставкасы оьтти. Бельгия элинде Россия посольствосында маданият эм илми орталыгында болган вернисажда бу шет элинде Россия элшиси Александр Токовинин, посольство эм православие динининъ ваькиллери Владыко Симон эм отец Павел, Левенский университетининъ студентлери, келеектеги дипломатлары, журналист Анастасия Попова, VZW коьпмиллетли Кавказ халклар ара организациясынынъ етекшиси Висмурад Гайтаев эм баска конаклар катнастылар. Туьркия элиннен выставкага белгили ногай йырлавшы эм композитор Арсланбек Султанбеков, Германия, Туьркия эллерининъ ногай маданият орталыкларынынъ ваькиллери келдилер. Бу шарады Сраждин Батыровтынъ тул хатыны, «АртАклия Травел» турист компаниясынынъ етекшиси Аклия Шадмуратова-Батырова Бельгияда Орыс уьйи эм ногай аьдеттеги маданиятын саклав эм янландырув фонды ман биргелесте уйгынлаган. Уьстимиздеги 2021-нши йыл Сраждин Батыровтынъ йылы деп белгиленген. Бираз алдын онынъ выставкалары Махачкала, Москва, Ставрополь калаларында оьткен, келеекте Каспийскте, Дербентте, Черкесскте уйгынлаяк.
Брюссельде тек Сраждин Батыровтынъ тувыл, устадынъ окувшылары Кошали Зарманбетовтынъ (ногай), Зарема Рашидовадынъ (лезгин), Шамсутдин Ахмадовтынъ (шешен), Султан Юшаевтинъ (карашай), Рената Майстердынъ (немец миллетли) ислери де выставкада коьрсетилген. Выставкадынъ озгарылувы Халк бирлестируьв куьни мен бирге келди, шарада Бельгияда яшайтаган ердеслеримизге Россия маданияты, санияты оьрленуьвине оьз уьлисин косканы уьшин баргылар тапшырылды. Соьйлегенлердинъ айтувы ман, Сраждин савлай дуныядынъ Аьдеми эди.
– Мен бек суьйинемен, выставкада биз коьплеген кызыклы аьдемлер мен растык. Мен шарады уйгынлаганларга эм выставкада катнасканларга разылыгымды билдиремен. Айырым савбол илми эм маданият орталыгынынъ директоры Вера Бунинага, выставкадынъ кураторы Татьяна
Федоровага Россиядынъ киши халкларынынъ бирисининъ ваькили Сраждин Батыровтынъ яратувшылыгын Бельгияда коьрсетпеге амал бергени уьшин. Мен туьрк дуныясынынъ уллы йырлавшысы Арсланбек Султанбеков пан танысканыма бек суьйинемен. Коьплеген йыллар артта 14 ясындагы кедеге Сраждин шынъкобыз савкатлаган эди, соны мен суьйип сизге айтаман. Суьвретши мен йолыгыс сол кедединъ эсинде сакланып, онынъ келеектеги бактысын белгиледи. Аьлиги заманда савлай халкымыз ога суьйип, Асау деп айтады. Мен оьз разылыгымды Германия элиндеги ногай маданият орталыгынынъ ваькиллерине билдиремен.
Мен бактыма бек разы, неге десе мен аз болса да, яркын заман оьз ногай халксыз яшап болмайтаган аьдем Сраждин Батыров пан яшадым, – деп айтты Аклия Шадмуратова-Батырова республикалык «Шоьл тавысы» газетасынынъ корреспондентине.
Солай ок ол айырым разылыгын ногай аьдеттеги маданиятын саклав эм янландырув фондына выставкада коьрсеткен видеолар, Ногай шоьли акында билдируьв, бесик йырлары акында Айна Черкесовадынъ хабарлары, Линара Иргалиевадынъ кийимлери уьшин билдирди.
Выставка карагыс айынынъ 17-нши куьнине дейим аьр саьли, киши юма эм уллы юма куьнлер озгарылаяк эм 4-нши карагыс куьн де ашылаяк.
Э.Кожаева, «Шоьл тавысы» республикалык газетасынынъ бас редакторы.
Суьвретте: шара катнасувшылары.
