2023-нши йыл Россия Федерациясынынъ Президенти Владимир Путиннинъ Указы ман Окытувшы эм насихатшы йылы деп беркитилген. Сол указ официаллы ыхтыяр билдируьвлер порталында баспаланып шыккан. Йылга сондай белги берилуьви босына тувыл, сол баспаланган документке коьре, бу йыл педагогикалык куллыкшысынынъ айырым статусын белгилев эм насихатлык аьрекетин янландырув ниет пен белгиленген.
Ызгы заманларда биз окытувшыдынъ кесписине уьйкен маьне берилетаганын коьремиз, педагогикалык окув ошакларына кайдай студентлердинъ келгенине де шайыт боламыз. Мектеблерге келетаган яс окытувшылардынъ тирилиги коьнъилди коьтермей болмайды, оларга ийги коьрим сулыплы специалистлер, ат казанган насихатшылар. Солар аркалы билимлендируьв тармакларында янъы педагогикалык юлдызлар да янадылар.
Билимлендируьв тармагында ис аьрекетин бир неше йыллардан бери бардыратаганлар коьрмей болмайды, аьлиги заманларда бу кеспиге карас туьрленгенин. Етекшилев органлардынъ ягыннан окытувшыдынъ ис аьрекетининъ сапатын куьннен-куьнге коьтеруьв уьшин аз куьш салынмайды. Бу куьнлерде окытувшыда оьзининъ кеспилик усталыгын оьстирмеге айлак коьп мырсатлар бар. Алдынгы заманларда ол тек оьз мектебинде, озып кетсе, район кезегинде оьзининъ бар сулыбы ман, билими мен боьлиспеге мырсаты болган болса, аьли ол россия кезегинде озатаган шараларда бир «колдынъ урувы ман» катнаспага болады.
Окытувшыдынъ кесписи уьйкен сыйлавга тийисли. Олар бизим балаларымызга оьзлерининъ ян йылувлыгын эм терен билимлерин берип тербияламага эм оьстирмеге ярдамларын этедилер. Арада окытувшы балага ата-анасы этетаганнан артык этпеге де болады. Ол балада, кишкей болса да, талап барын коьрсе, соны кесеклеп йыйып, уьйкен яшавга шыгармага куьш салады.
Кайсы йылларда айтылган болса да, акыллы аьдемлер окытувшы акында айткан болса да, солардынъ аьр бирисинде ортак ой бар – Окытувшыдынъ бек уьйкен ямагат маьнеси бар.
Янъыларда Окытувшыдынъ эм насихатшыдынъ йылынынъ ашылувына багысланып, А-Х.Джанибеков атындагы мектебинде кызыклы шара озгарылды. Шарады мектеб окувшылары Хансолтан Эсиргепов пан Азизат Аджигельдиева юриттилер. Шарага педагогикалык ис аьрекетининъ ветеранлары, коьпйыллык кыйынын оьсип келеяткан несилди тербиялавга багыслаган аьдемлер шакырылган эдилер. Бу куьн Окытувшы эм насихатшы йылынынъ ашылувына багысланган кешликти окувшылардынъ йыр куьби ашты.
Хош келди соьзин мектеб етекшиси Курасхан Ярикбаева айтканнан сонъ, Гульханум Максутова «Не смейте забывать учителей» деген ятлавды окып, эситтирди.
«Ногайский район» МР администрациясындагы Билимлендируьв управлениесининъ етекшиси Алтын Агаспарова белгиленген йылды кайтип озгарылаягы акын, тармак алдында салынган план ман боьлисти. Онынъ соьзине коьре, билимлендируьв тармагында бу йылга багысланып коьплеген шаралар озгарылаяклар. Бир неше йыл артта, окытувшылардынъ алдында профсоюз организациясын етекшилеген Зарета Аюповадынъ (яткан ери еннетте болсын) айтылган ойы – Ногай районында авыл окытувшысынынъ бюстин салмага керек дегенин яшавга шыгармага ниетленетаганын да Алтын Даутовна билдирди. Солай ок М.Курманалиев окувларын да озгармага ой барын келген конаклар эситтилер. Шарадынъ барысында Ногай район билимлендируьв тармагынынъ профсоюз организациясынынъ етекшиси Н.Джумаева педагогикалык ис ветеранларына разылык хатлар ман гуьллер тапшырды. А-Х.Джанибеков атындагы мектеб профсоюз етекшиси Д.Ахмедова да оьзлерининъ насихатшыларына савгалар берди.
Кешлик юритуьвшилерининъ билдируьви мен А-Х.Джанибеков атындагы мектебинде бу куьнлерде кайдай етимислери болган окытувшылар куллык этетаганын да билдик. Шара окувшылардынъ эм «Карлыгашлар» балалар биюв ансамбли мен аьзирленген концерт программасы ман тамамланды.
Г.Сагиндикова.
Суьвретте: шара мезгилинде.