Юкпалы авырувлар, СПИД маразынынъ алдын шалув эм соны ман куьрес юритуьв республикалык орталыгы Дагестан медицина организацияларында коронавирус маразыннан тура кенъейтилген уьйренуьвлер оьткерилген.

Бизим республикада коронавирус пан авырыганлар табылмаган. Болса да, ДР савлык саклав министерствосы бизим медиклер кайсы ягыннан да коронавирус маразы ман йолыгысувга аьзирлик коьрсин деген ниет пен айырым куллык уйгынлаган. Специалистлер районлардынъ эм калалардынъ орталык больницаларында болганлар. Уьйренуьвлер заманында биревге де билдирилмегенлей, коронавирус пан авырыган ким ди бирев Ираннан Москвага, соннан Дагестанга келгендей этилинип туьзилген сценарий бойынша шаралар оьткерилгенлер.

«Ногайская ЦРБ» ГБУ медицина куллыкшылары да анъсыздан сондай уьйренуьвлерди оьткергенлер, ол зат яшавшылар арасында бираз навасызланувлар тувдырган.
«Ногайская ЦРБ» бас врачы Фаризат Межитова айтканлай, районда коронавирус пан авырыган аьл болганы белгиленмеген. Ногай районына быйылдынъ 17-нши увыт айында келген эм аьли теплицаларда ислеяткан Китай Халк Республикасынынъ гражданлары врачлардынъ тергеви астына алынганлар.

Ога дейим олар эки юма узагында Пятигорск калада инкубационлык тергев кезегин оьткенлер эм ден савлыгы яравлы деген шайытламаларын алганлар. Муннан сонъ, олар бизим районга келгенлер.

Бас врачтынъ соьзлерине коьре, быйыл 4-нши навруз айында «Ногайский район» МР аькимбасы Мухтарбий Аджеков авыл поселение аькимбаслары эм район орталык больницасынынъ куллыкшылары ман кенъесуьв оьткерген. Сонынъ тамамында Ногай районы еринде шет эллерден келген гражданлар барлыгы бойынша соравды тергев уьшин теплицалар орынласкан ерлерге сол куьн ок та барув кереги акында карар кабыл этилинген.