«Шоьл тавысы» республикалык ногай газетасы быйыл оьзининъ 90 йыллыгын белгилеек. Коьп оьзгерислер болды сол заман ишинде. Олар оьз заманында таптылар орын газета бетлеринде. Баслап ол район газетасы эди, сонъында республикалык дережеде шыгарылып басланды. Оны туьрли йылларда халкымыздынъ сыйлы аьдемлери, ана тилимиздинъ «Шоьл тавысы» (алдынгысы «Шоьллик маягы») газетасынынъ тарихинде атларын калдырган ердеслеримиз Абдулмежид Аджибаев, Бадий Аджигельдиев, Куруптурсун Кокоев, Абдулла Юсупов, Сейдахмет Рахмедов, Каирбек Юмартов, Динислам Адисов, зейинли шаирлеримиз Мурат Авезов эм Магомет Кожаев басшыладылар, ызгы заман газетадынъ бас редакторы – Эльмира Кожаева.
Бу ногай газетамыздынъ редакциясында мен аьрекет эткенли де аз заман кетпеди: 35 йыл. Аьлиге дейим эсимде мунда куллыкка келген биринши куьним. Мундагы коллектив агзалары, яратувшылык пан каьрлевши тек эрлер эди: Куруптурсун Оразбаев, Муса Отаров, Рашидхан Ораков, Алев Алимов, Маркс Етмишев, Климбек Савкатов, Мурат Авезов, Магомет Кожаев, Айнадин Даутов, афганшы Адильгерей Аджиев. Яваплы секретарь ис орынына келген мен мунда ялгыз кыскаяклы эдим сол заман. Сонъында коллектив сырасын яс журналистлер, шаир Магомет-Али Ханов эм баскалар толыстырдылар.
Аьли компьютер технологиялар аьлинде газетады ер юзине эндируьв тыныш болды, алдын болса газетамыз линотип эм баска эски типография алатлары ярдамы ман шыгарылатаган эди. Коьз алдымда сол заман: аьр бир макала аьриплерден тизилип ерлестиретаган эди газета бетлеринде баспаланаяктан алдын, сонъ корректордынъ, газетадынъ сол номери уьшин яваплы журналисттинъ эм редактордынъ тергевлериннен сонъ дуныя ярыгына шыгарылатаган эди. Аьр бир куллыкшымыз соьз усталары эди, соны уьшин баьри газета жанрларында да бажарымлы ислейтаган эдилер.
Коьплеген эм кызыклы рубрикалар астында газетамыз бетлеринде яшавымыздынъ туьрли тармаклары акында язылган эм язылады. Айтпага, «Балалар – бизим келеектегимиз», «Ден савлык – бас байлык», «Аьдем иси мен сыйлы», «Данък эм сый», «Аьдем бактысы» эм коьплеген баскалар. Кызыклы иштеликли болып шыккан эм шыгарылады тематикалык бетлер: «Карлыгашлар» (балалар уьшин бет), «Алаллык» (согыс-патриотлык бет), «Кызйибек» (кыскаяклылар акында бет), «Закон эм биз» (ыхтыярларымыз акында) эм баскалар.
Кызыксындырады бизим газета окувшыларымызды «Халкымыздынъ алтын фонды» рубрика астында шыгарылатаган макалаларымыз.
Буьгуьнлерде газета редакциясында зейинли журналистлер аьрекет этедилер. Олардынъ аьр кайсысы – Дагестан эм Россия Журналистлер союзларынынъ агзасы. Баьри газета жанрларын усташа кулланув ман олар аьр номерде оьз окувшыларын кызыксындырадылар. Олардынъ туьрли суьвретлевлериннен, очерклериннен, билдируьвлериннен эм баска газета жанрларыннан язылган макалаларыннан окувшыларымыз йылдынъ маьнели оьзгерислери, болган эм болаяк затлар акында биледилер, халкымыздынъ атаклы, сыйлы ясуьйкенлеримиз акында окыйдылар, туьрли яшав тармакларда оьз иси мен сый казанган ердеслеримизди эске аладылар, уьйкен етимислерге етисетаган яс несил ваькиллери акында билип, оьктемсийдилер.
Ана тилинде шыгарылатаган «Шоьл тавысы» респуб- ликалык газетасына тезден – 90 йыл. Мунда аьрекет этетаган зейинли журналистлер Магомет Кожаев, Магомет-Али Ханов, Эльмира Кожаева, Гульфира Бекмуратова, Гульмира Нурдинова, Нурият Кожаева, Галима Сагиндикова, Гульмира Аблезова, янъы компьютерлик технологияларын ис аьрекетинде усташа кулланатаган куллыкшыларымыз – газета сайтынынъ специалисти Аминат Каракаева, дизайнер Лиза Бекмурзаева, бас бухгалтер Сакинат Утегенова, корректор Азинет Башиева, техничка Тасират Мансурова, коьлик айдавшы Эмиль Акбулатов. Аьр бириси оьзининъ ис борышларын ерине еткерип толтырады, газетамызды ер юзине эндируьвге оьз уьлисин косып. Олардынъ каныгыслы куллык этуьви аркасында ана тилимизде шыгарылатаган «Шоьл тавысы» газетасы дуныя ярыгын коьрип тураяк. Ол – шынтылай да кенъ тоьселип яйрап яткан шоьлимиздинъ тавысы, 90 йылга заман соьнмеген эм армаганда да соьнмеек.
Л.Уразаева,
Россия Журналистлер союзынынъ агзасы.
