Ногай халкымыздынъ адабиат тармагындагы етимислери акында эситсек, суьйиништен тоьбемиз коькке етеди. Янъыларда, тамбыз айынынъ 26-ншы куьнинде, Махачкаладагы Поэзия театрында шатлыклы байрам йолыгысы болып озды. Сонда белгили ногай язувшымыз Карашай-Шеркеш Республикасынынъ Халк язувшысы Иса Суюн увылы Капаевке Савлайроссиялык адабиат баргысы «Саманта» деген романы уьшин берилди. Язувшымыздынъ акында айтканда, онынъ халкы, эли уьшин коскан адабиат уьлиси оьлшемсиз уьйкен экенин оьктемсип айтпага боламыз. Ол – Россия Язувшылар союзынынъ агзасы, РФ ат казанган маданият куллыкшысы. Онынъ асарлары болгар, казах, каракалпак, орыс тиллерине коьширилгенлер.

2006-ншы йылда болса, Иса Суюн увылынынъ аты «Россиядынъ энъ данъклы аьдемлери» деген энциклопедияга, 2016-ншы йылда болса, «Аьлиги замандагы россиядынъ тарихшилери» деген энциклопедиялык соьзлигине киргистилгенлер.
Россия элимиздинъ сыйлы адабиат баргысына тийисли болган оьрметли язувшымызды сондай уьстинлиги мен ак юректен кутлаймыз эм келеекте де ога тыныш болмаган оьнершилик йолында бийик етимислерди, соларга еткергендей темирден каты ден савлыкты йораймыз.
С.Майлыбаева
РФ Язувшылар союзынынъ агзасы.