Ногай футбол лигасы коьп йыллар бойы ер юзинде яшайтаган ногайларымыздынъ арасында оьтип келуьви мен дослык, кардашлык коьпирин уьзбей беркитип келеди. Бу йылдынъ июнь айында да сол ниетте ясларымызга тагы да бирге йыйналмага себеп болды. Олар аьдетке кирип келген ойынында уьстинликлер, уьйкен усталыгын коьрсеттилер эм соны ман бирге шашырап туьрли ерде яшав суьрген ногайлар арасындагы татымлыкты, ногай миллетимиздинъ сыйын оьстирмеге, онынъ атын данълатпага кишкей косымын эттилер.
Соьйтип, янъыларда Карашай-Шеркеш Республикасынынъ бас каласы Черкесскте «Нарт» деген стадионында ногай халкынынъ алал увылы, Совет Союзынынъ Баьтири Халмурза Кумуковтынъ эстелигине багысланып 2023- нши йылдынъ Ногай футбол лигасынынъ зона ЮГ-1 сайлав кезеги уйгынланып оьтти. Спорт шарасынынъ сайлав кезегинде Ставрополь крайыннан Степнов районынынъ эм Нефтекум кала округынынъ, солай болып, Карашай-Шеркеш Республикасынынъ Ногай районыннан командалары ортакшылык эттилер. Футбол ойынында катнаскан командалары бир-бириси мен авысып ойнап шыктылар. Ойыннынъ тамамына коьре Икон- Халк авылынынъ «Шаьбден» командасы биринши орынга, Каясула авылыннан «Каясула» командасы 2-нши орынга, Икон-Халк авылыннан «Тохтамыш» командасы 3-нши орынга тийисли болдылар. Солай болып, енъуьвши футбол командалары финал кезегине шыктылар. Ойыннынъ финал кезеги Дагестаннынъ Ногай районынынъ Терекли- — Мектеб авылында уьстимиздеги йылдынъ сары тамбыз айынынъ 5-6-ншы куьнлеринде озгарылаяк.
Белгилеп оьтейик, Ногай футбол лигасы – 2015- нши йылдан алып Москва каласындагы «Ногай ямагаты» деген регионаллык ямагат организациясынынъ ойы бойынша туьзилип, буьгуьнлерге дейим де аьрекет этип келеди. Онынъ Sandyk.biz. деген биринши ногай Интернет туькени официаллык спонсоры болады.
Г.Нурдинова.
Суьвретте: Ногай футбол лигасынынъ катнасувшылары.