Яратувшылык пан байланыслы аьдемнинъ яшавы дуныяга дайым ийгилик себип, оны ярасыклап келеди. Сондай кызыклы бактысы ман аьдемлердинъ бириси болады Байрамбике Якуб кызы Ялалова.
Ол асылы ман Ногай районынынъ Кумлы авылыннан болады. Конаксуьер авылынынъ белгили койшыларынынъ бириси Якуб эм Шаар Межитовлардынъ коьп балалы татым аьелинде тувган. Сол йылларда халкымызда 10 бала болган аьеллердинъ саны коьп болган. Межитовлардынъ аьелинде 4 увыл эм 3 кыз тувып, аьр кайсысы да яшавда оьз орынларын таптылар. Малшылык пан каьр шеккен Якуб атасы ман Байрамбике бала шагында шоьлде коьп кезген.
Юрегинде ювсан кокыган шоьлге уьйкен суьйимди, онда малкылдасып оьскен шешекейлерди, ак кум буйратларында ойнаганын кагытка туьсирип келди. Исли, оьнерли Оразгани тетесининъ кол усталыгы ман сукланып, онынъ колынынъ астыннан уйылып дуныя ярыгына шыгарылган уйыкларын, тиккен коьйлеклерин коьрип, ога усамага суьетаган эди. Белки ясав оьнери де сол Оразгани тетесиннен коьшкен де болар. Мектебте окыганда, ол ийги окувшылардынъ бириси болды. Мектебте оьткен туьрли шараларда белсенли катнасып келди. Ясав оьнери, бала шактан тувган мырады кызды ДГПИ-нынъ Махачкаладагы суьврет-графикалык боьлигине билим алмага аькеледи.
Шешен Республикасынынъ ногай ясы Руслан Ялаловка эрге шыгады. Баслап кыскаяклы Червленная станицасынынъ мектебинде ясав, черчение дерисин берип келеди. Коьп заман кетпей, яс аьелге Астрахань каласына коьшпеге туьседи. Байрамбике Якуб кызы онда педагогикалык колледжинде ногай тилин окытып баслайды. Сол исине ол ямагат аьрекетшиси Равиль Утемухамедович Джумановтынъ демевлиги мен кириседи. Ол ногай халкынынъ тарихи мен кызыксынып, оны терен уьйренуьвде сав куьшин салады. Ана тилинде «Тулпар» телеберуьвинде юритуьвши болып, радиодан ана тилиннен соьйлеп келеди. Кыскаяклы «Бирлик» деген ногай маданиятынынъ ямагаты ман тар байланыс тутып келген. «Эдиге» деген АРОО ногай маданиятынынъ орталыгы ман озгарылатаган кайсы ногай кешликлерде де белсенли ортакшылык этип келеди.
Буьгуьнлерде Байрамбике Якуб кызы Астрахань областинде белгили индивидуальлик предпринимательлерининъ бириси. Астраханьдеги ООО «Экопрод» толтырма (колбаса) шыгармалары заводынынъ ваькили болып, оларды сонынъ ишинде «Ногайский» деген аты ман толтырмады Дагестан, Ставропольский край, Шешен Республикасы, Астрахань области бойынша яйылдырувда демевлигин этип келеди. Кыскаяклыдынъ айтувы ман онынъ командасынынъ агзалары баьриси де ногайлар боладылар.
Ызгы заманларда шоьл кызы колына ясав калемин тагы да ыслады. Ол ун яюв такталарына бала шагыннан юрегининъ тоьринде ыз калдырган аллы ясыл шоьли, ак буйратлары, танъла-йында дайымга даьми калган сапсары ногай шайы, термелери коьрсетилген суьвретлерди ясап, коьнъилиндегин тыска шыгарып келеди. Халкынынъ шынты патриоты Байрамбике Якуб кызы тувган ериннен, Ногай шоьллигиннен эректе турса да, юреги мен дайым халкынынъ бактысы ман яшайды, дайым юрегинде тенъ-досларын, кардаш-тувганларын баалап саклайды. Исин суьйген аьрекетшиси болып калмай, ол наьсипли ана да болады. Ян косагы Руслан ман курган татым аьелде уьш сылув кызлары Камила, Динара эм Руслана тербияланып, аьр кайсысы да куллыгында, окувлары бойынша етимислери мен куьезлендирип келедилер. Алина эм Карим уныклары болса, олардынъ яшав куьезлерин арттырып, наьсип саьвлесин косадылар. Сол тувыл ма наьсип дегенинъ!
Г.Нурдинова.
Суьвретте: Байрамбике Ялалова кызлары Камила, Динара эм Руслана ман; Б.Ялалова суьвретлеген ун такталары.
