Россия Федерациясынынъ Президентининъ 2013-нши йылдынъ 26-ншы коькек айындагы Тапшырувы ман келисли кепте быйылдынъ 14-нши декабринде куьндизги 12 саьаттен 20 саьатке дейим гражданларды кабыл этуьв ортакроссиялык куьни оьткериледи. Соны ман байланыста «Ногайский район» МР администрациясында гражданларды район аькимбасы эм онынъ орынбасарлары кабыл этеек.

«Ногайский район» МР ериндеги санитар-эпидемиологиялык аьлди эсапка алып эм янъы коронавирус юкпалы маразынынъ (COVID-19) алдын шалув ниетте потребительлер ыхтыярларын эм аьдем эмишлигин коршалав тармагында тергев юритуьв бойынша федераллык службасы маслагат этеди:
– район аькимбасы ман йолыгысувга кируьв уьшин куьнибурын язылувды уйгынлав акында;
– аьризе беруьвшилердинъ сакланув шараларын тутув кереги акында;
– йолыгыс заманын кыскартув ниетте аьризеди язылма кебинде эртеректен аьзирлев акында;
– йолыгыс заманында социаллык аралыгын (1,5-2 метр эрек турувды), тыныс алув муьшелерин коршалав алатларын (медициналык яде тазалык маскаларын), колгапларды кулланув эм коллар тазалыгын тутув кереги акында.
Солай ок яшавшыларды кабыл этуьв видео-конференц-байланыс, видеобайланыс эм аудиобайланыс кебинде оьткерилеек.
«Ногайский район» МР администрациясынынъ уполномоченныйы аьризе беруьвшидинъ ыхтыяры ман онынъ соравын яде тилегин авызлама кебинде берилетаган соравларды шешпеге амалы бар болган баска органлардынъ уполномоченныйларына видео-конференц-байланыс, видеобайланыс эм аудиобайланыс йорыгы ман йибереди.
Район етекшилери мен йолыгыс тири шерет кебинде оьткериледи, йолыгыска паспорт пан келмеге тарык.
«Ногайский район» МР администрациясында гражданларды кабыл этуьвге куьнибурын эртенъги 9 саьаттен алып кешки 16 саьатке дейим, 8(8722) 55-33-51 телефон номерине занъ согып, язылмага болады.