Юрек дерти ________________

Савлай ногай халкы эм илми ямагаты ногайымыздынъ белгили аьлимлериинъ бириси, тарих илмилерининъ докторы, Россия Язувшылар союзынынъ агзасы, 150-ден артык илми куллыкларынынъ авторы, ногай халкынынъ этнографы, драматургы Рамазан Хусинович Керейтовты дуныядан таювы ман каты кайгырады.

Буьгуьнлерге дейим белгили аьлими ногай миллетининъ энуьви, тарихи, оьрленуьви уьстинде белсенли куллык этип келген. Ол тек тарих илмилерининъ докторы болып калмай, кенъ, ашык юрекли, аьр кимге де йылувлык пан караган аьдем болган. Рамазан Хусиновичтинъ илми куллыклары Россия эм шет эллер илми ямагатлыгы ягыннан тийисли бааланып келгенлер. Ол кайсы илми амалламаларда да катнасып, ногай халкынынъ атын тийисли оьлшемде айттырган. Рамазан Хусинович Керейтов оьзиннен сонъ коьплеген он йыллыклар аьлимлер пайдаланмага болаяк уьйкен илми асабалыгын калдырып уьлгирди.

Белгили аьлимнинъ 75 ясында дуныядан кешуьви баьримизге де толтырылгысыз йойым болды.
Рамазан Хусинович Керейтовтынъ дуныядан таювы ман байланыста онынъ ювыкларына, кардаш-тувганларына авыр кайгысын боьлисемиз эм оларга каты кайгырувымызды билдирип, бассавлык йораймыз.

Туьрк ногайлар организациясынынъ басшысы Джемиль Сутбаш, Халклар ара туьрк колледжининъ етекшиси Хамза Йылмаз, Джем Арслан, Мерал Таналары (Анкара каласы), Абдуллах эм Фатих Караянды (Адана каласы), Вейсель Демир, Алим Максутов (Стамбул).