Буьгуьн, 19-ншы апрельде, Дагестан Аькимбасы Сергей Меликов Дагестан Республикасынынъ Халк Йыйынынынъ депутатлары алдында кезекли йылсайынлык Язбасы ман шыгып соьйлеек. Оьзининъ Язбасында регион етекшиси Дагестаннынъ социал-экономикалык оьрленуьвининъ быйылга эм ювыктагы йылларга каратылган бас приоритетлерин белгилеек.
Республика басшысы бас деп Украинада юритилип турган специальли согыс операциясы ман байланыслы аьллер акында айтар деп ойлайман. Сонда буьгуьнлерде бу элдеги нацист козгалысты йок этуьв аьрекетинде бизим юзлеген яс йигитлеримиз ортакшылык этедилер. Олар баьриси де канын-янын аямай Россиядынъ бойсынмаслыгын эм суверенитетин коршалайдылар. Соны ман байланыста Сергей Меликов СВО катнасувшыларын эм олардынъ аьеллерин социаллык ягыннан колтыклав соравы акында айтаягына бир шексиз сенемен.
Регион аькимбасы солай ок билимлендируьв, медицина, дагестанлыларды социаллык яктан канагатлав маьселелерин шешуьв соравларын да козгар деп ойлайман. Быйыл Ногай районында бир ок заманда Кумлы, Батыр-Мурза эм Шумлелик авылларында аьлиги заманга келисли 3 ортакбилимлендируьв янъы мектеб меканлары курылып басланганы бизди суьйинтпей болмайды.
Соны ман бирге Меликов Ногай шоьллигининъ кумланув, авыл хозяйстволык маьнелиги болган эм коьшимли малшылык ерлерин дурыс кепте кулланув соравлары бойынша оьз ойын айтар деп сенемен.
Элбетте, Дагестан Аькимбасы оьзининъ Язбасында республика яшавшыларынынъ тагы да коьп маьселелерине эс этер деп ойлайман.
Э.Саитов,
Ногай район Ямагат палатасынынъ председатели
Халк яшавын яхшыртувды бас маьселе деп белгилер
![](https://golosstepi.ru/wp-content/uploads/sites/7/sites/7/2023/02/saitov-na-6-768x1024.jpg)