– Оьткен юма сонъгы куьн, 23-нши апрельде, Ногай районынынъ Терекли-Мектеб ериндеги орыслар оьлигинде ерлескен Александр Невский атындагы церковьте муниципалитеттинъ орыс яшавшылары уьшин Пасха байрамына багысланып шатлык шарасы озгарылды, – деди «Шоьл тавысы» газетасынынъ хабаршысына староста Георгий Тавакалов. Оны Кизляр каласынынъ Никольский Соборынынъ штаттагы клирики отец Дионисий юритти. Аьдеттеги дуалардан сонъ, ол юмырткалар эм тизилип салынган ас уьстине киели сув шашты, солай ок баьри йыйылганларды байрам ман кутлады эм ден савлык йорады. Алдыда «Родительская суббота» экенин билдирди.

Бир куьн алдын бу ярык Пасха байрамы ман христианларды Ногай район аькимбасы Мухтарбий Аджеков та кутлады. «Сизди ак юректен уллы байрам – киели Пасха ман кутлайман. Ол суьйиниш, танълык, яманды яхшы енъеегине сенимлик тувдыратаган ярык байрам. Пасха ийги ислерге, языксынувга, коьмеклесуьвге, ямагат арасында эдаплыкты ийгилендируьвге демевлигин тийгистеди.
Кайсы динди тутсак та, аьр биримиз, берк анъ-акыл негизли болып, оьз халкынынъ аьдет-йорыкларын билмеге керекпиз. Буьгуьнде, баьримиз уьшин енъил тувыл заманда, биз языкшыл, шыдамлы, ювыкларга суьйимликти тутып, элимиздинъ патриотлары болмага тийислимиз. Аьр уьйге бу куьн суьйиниш, ийги коьнъиллик, онъайлык эм келеекке сенимлик аькелсин. Дайым да сизинъ аьеллеринъизде тынышлык, ийгилик, макулласув, суьйимлик эм ийгиликке сеним болсын, – деген ол.
Александр Невский атындагы церковь 2005-нши йылда салынган, ама тамлары онынъ аьли де сырланмаган, ишинде Алтарь де ерлестирилмеген. Георгий Тавакаловтынъ айтувы ман, онда ремонт ислерин озгармага керек, эм бу яктан тек район аькимбасы М.Аджеков ярдамын тийгисткен: онынъ байыр акшасы ман церковь тоьбеси ярастырылган, а иш бетин ярастырувга карыж йок.
Э.Кожаева.