Янъыларда ярастырув куллыклар тамамланганнан сонъ, «Россельхозбанк» ОАО-нынъ Терекли-Мектебтеги косымша офиси ашылды. Онынъ шатлыклы ашылувына сыйлы конаклар йыйылдылар: «Россельхозбанк» Дагес- тан регионаллык филиалынынъ директоры Елена Гончаренко, регионаллык тармагынынъ толтырувшы директоры, бас офисининъ ваькили Ольга Дьяченко, «Россельхозбанк» Дагестан регионаллык филиалынынъ директорынынъ орынбасары Михаил Михайличенко, «Ногайский район» МР администрациясынынъ аькимбасынынъ орынбасары Баймагомед Ярлыкапов, «село Терекли-Мектеб» СП МО администрациясынынъ аькимбасы Зейдулла Аджибайрамов эм баскалар.

Шара юритуьвши ДР ат казанган маданият куллыкшысы Сабират Абубекеровадынъ йыйылганларга каратылган хошлав соьзинде банктынъ ашылувынынъ тарихи акында айтып кетти.
Елена Гончаренко Ногай районындагы «Россельхозбанк» косымша офисининъ управляющийи Абдурахман Койлубаевке кыска заман ишинде головной офис салган мыратлар эм борышларды коьтергишлейтаган талаплы эм билимли яс куллыкшылар командасын йыйнаганы уьшин уьйкен разылыгын билдирди. Солай ок, ол Ногай районындагы «Россельхозбанк», ОАО регионаллык тармагы бойынша, 2021-нши йылда аьрекети бойынша 1-нши орынды бийлегенин айтты.
Оннан сонъ, Баймагомед Ярлыкапов аграрлы, авылхозяйстволык болган Ногай районында «Россельхозбанкынынъ» филиалынынъ аьрекетлевининъ маьнесин белгиледи. Банк куллыкшылары бизге туьрли программалар бойынша патшалыктан ярдам алувда оьз коьмеклерин этееклерине сенимин билдирди.
Тагы да бу куьн кутлав соьзлерин «село Терекли-Мектеб» СП МО администрациясынынъ аькимбасы Зейдулла Аджибайрамов, Ногай район Депутатлар йыйынынынъ председатели Джамалутдин Эсиргепов, Ногай районы бойынша Россия ОМВД етекшиси Наиб Каракаев айттылар. Олар Ногай район яшавшыларына «Россельхозбанк» ОАО-нынъ Терекли-Мектебтеги косымша офисининъ управляющийи Абдурахман Койлубаев ягыннан этилинетаган ийги эс, онынъ куллыгына уьйкен яваплылык пан каравын белгиледилер. Банк буйымларын алувшылардынъ онъайлыгы уьшин айлак кыска заман ишинде ярастырув куллыклар толтырылганы акында да айттылар.
«Россельхозбанк» Дагестан регионаллык филиалынынъ етекшилевине Абдурахман Ильясович оларга этилинген сеним эм амаллар уьшин разылыгын билдирди.
Кызыл лентады кеспеге ыхтыяр Елена Гончаренкога, Баймагомед Ярлыкаповка эм Абдурахман Койлубаевке берилди. Сонъ конаклар ийги ярастырылган мекан ишине кирдилер.
Н.Кожаева.