Дагестан Республикасынынъ бас каласында орыс театрында Россия Федерациясынынъ халк артисткасы, ногай халкынынъ белгили йырлавшы кызы Асият Кумратовадынъ мерекели кешлиги шатлыклы аьлде оьтти. Бизим сыйлы ясуьйкенимиз оьзининъ мерекесин белгиледи.

Ногай шоьлдинъ оьрметли кызына сый этип, Россия элининъ туьрли муьйислериннен бизим халкымыздынъ ваькиллери келгенлер – Астрахань области, Карашай-Шеркеш Республикасы, Дагестан Республикасынынъ Ногай районы эм баскалар.
Биринши соьзди Дагестан Республикасынынъ маданият министрининъ орынбасары Мурат Гаджиев эм «Ногайский район» МР администрация аькимбасынынъ орынбасары Баймагомед Ярлыкапов айттылар. Олар Асият Сулейман кызы Кумратовады сыйлы мереке мен кутлап, ден савлык эм яратувшылык йолында аьли де коьп уьстинликлер йорадылар. Солай ок мерекешиди Дагестан Республикасынынъ эм баска регионларынынъ маданият тармагынынъ аьрекетшилери, власть органларынынъ етекшилери, шаирлер эм организациялар басшылары кутладылар.
Асият Кумратовадынъ мерекесине багысланган концерт программасында патшалык биюв эм йыр ансамбли «Дагестан», опера эм балет театрынынъ балет куьби, Мурад Кажлаев атындагы симфониялык оркестри, Ногай патшалык фольклор-этнографиялык «Айланай» ансамбли, ногай патшалык саз алатлар оркестри, ногай патшалык драмалык театры эм дагестан йырлавшылар катнастылар.
Кешлик тамамында Асият Сулейман кызы Кумратова келгенлерге оьз разылыгын билдирди, суьйикли халкын занъыраган куьшли сеси мен йыр йырлап сукландырды.
Мерекели шара шатлыклы аьлде оьтти.
Г.Бекмуратова.
Суьвретте: А.Кумратова.