Янъыларда Тарумов районынынъ маданият орталыгынынъ артистлери мен 8-нши Март – Халклар ара хатын-кызлар байрамына багысланган Александро-Невское авыл маданият орталыгында концерт уйгынлап озгарылды. Концертти Елена Ремизова юритти. Александро-Невское авыл яшавшылардынъ коьнъилин коьтермеге келген яратувшылык куьбине Жанна Алиева, Дмитрий Болохов, Елена Ремизова, Шахбан Нурахмаев, Гульнара Баландина, Фатима Исаева, Наргиза Маммаева эм сондай баскалар кирген эдилер. Шарадынъ барысында Александро-Невское авыл аькимбасы Алишер Менглимурзаев кутлав соьзи мен шыгып соьйледи.

Авыл аькимбасы баьри кыскаяклыларды да Хатын-кызлар байрамы ман кутлап, оларга баьри ийги йоравларын багыслады. Концерт программасында Александро-Невское авылыннан яс артистлери де ортакшылык эттилер. Олар Дагестан Республикасындагы туьрли халкларынынъ биювлерин уьйкен усталык пан ортада коьрсеттилер. Маданият уьйининъ залында йыйналган авыл яшавшылары сценада оьз оьнерлери мен боьлискен аьр бир артистлерин йогары коьнъилде йолыктылар. Сценада йырланган аьр бир йырды эс берип тынъладылар.

Коьнъиллери коьтерилген каравшылар артистлердинъ йырлары ман карс кагып, ортага шыгып бийидилер.
Соьйтип, Тарумов районынынъ Александро-Невское авылында байрам концерти йогары коьнъилде оьтти.
Суьвретте: шарадан коьринис.