Кыскаяклылар дуныяды оьз танълык эм ыспайылык ярыгы ман бийлеп келедилер. Дуныяда баьри ярык эм яхшы затлар кыскаяклылардынъ аты ман эм иси мен байланыслы. Кыскаяклылардынъ яшавын ярасыклав эм оьрметлев ниетте районымызда язлык байрамына рас барып, туьрли организациялар ман коьп туьрли кызыклы шаралар озгарылып келедилер. Солай болып, Терекли-Мектебте «Ак юректен» деген клубы да авыл кыскаяклыларынынъ яшавын кызыклы этуьв мыратта коьп йыллардан бери аьрекет этип келеди.
Янъыларда навруз айынынъ басында Халклар ара хатын-кызлар куьнине Терекли-Мектеб авылынынъ «Лира» кафесинде «Ак юректен» («От всей души») деген кыскаяклылар клубынынъ агзаларына багысланып шара уйгынланып оьтти.
Йыл сайын клубтынъ агзалары туьрли байрамларга, мерекелерге йыйналып заманын кызыклы эм пайдалы озгармага шалысадылар.
Янъыларда да Терекли-Мектеб авыл яшавшысы Курманбийке Аджигайтаровадынъ уйгынлавы ман клуб агзалары Хатын-кызлар куьнин шатлыклы аьлде байрамшыладылар. Бу байрам шарады ис ветераны Зарифа Оразбаева юритти. Клуб агзаларына деп туьрли зияпетли сыпыралар да туьзилген эди. Кыскаяклыларга туьрли ойынлар, ярыслар, лотерея ойыны озгарылды, аьр бир катнасувшыга, енъуьвшилерге туьрли савгалары тапшырылды. Сол шарага келген аьр кайсы кыскаяклы да байрам шарасыннан савгасыз кетпеди, олар ногай, орыс тиллеринде йырларды, сарынларды эслерине туьсирип йырладылар, байрам ман кутлап, йылы йоравлар айттылар, биюв оьнери мен базластылар. Соьйтип, ясуьйкен кыскаяклылары заманларын бек кызыклы эм пайдалы озгарып тыншайдылар.
«Ак юректен» клубынынъ етекшиси Курманбийке Аджигайтарова эм онынъ агзалары шарады озгарувда оьз спонсорлык ярдамын эткен Терекли-Мектеб авылыннан бизнес пен каьрлевшилер Батирхан Бийболатовка («Батыр» туькени), Айганат Аджигайтканова («Поиск» туькени), Терекли-Мектеб авыл администрациясынынъ аькимбасынынъ исин кесек заманга юритуьвши Вазир Аблезовка уьйкен разылыгын билдиредилер. Язлыктынъ ярасык байрамына йыйылган «Ак юректен» клубынынъ агзаларын индивидуальлик предприниматели Мырас Юмартова «Лира» кафесинде йылы хош коьрип алды.
Шарадынъ сонъында «Ак юректен» деген кыскаяклылар клубынынъ агзалары йыйылып эстеликке суьвретке де туьстилер.
Соьйтип, сол шатлыклы куьн кыскаяклыларымыз заманын йогары коьнъилде эм кызыклы озгардылар.
Айтып озайык, «Ак юректен» деген кыскаяклылар клубы 2011-нши йылда ис ветераны, алдынгы йылларда ерли администрациясында секретарь ис аьрекетин юриткен Зарифа Искаковна Оразбаевадынъ етекшилиги мен 2018- нши йылга дейим аьрекет этти. Баслап клуб тизимине 20 кыскаяклылар кирген эдилер. 2018-нши йылдан алып оны Терекли-Мектеб авыл яшавшысы Курманбийке Аджигайтарова етекшилеп келеди. Буьгуьнлерде «Ак юректен» клубынынъ агзаларынынъ саны 29 болады, айтпага, олар Т.Елакаева, Е.Эракаева, З.Тилекова, К.Тунгатарова, Х.Аманакаева, Т.Шураева, Т.Суюнова, Ш.Аблезова, К.Бийбулатова, З.Койлыбаева, М.Акмурзаева, Т.Демочкина, З.Оразбаева, Н.Аблезова, Р.Абдулкеримова эм сондай баскалар боладылар. Йыл сайын онынъ сырасына янъы катнасувшылар косылып келедилер. Буьгуьнлерде клуб агзаларынынъ омыравында «Ак юректен» деген язувы болган оьз белгилери де бар. «Ак юректен» клубынынъ аьрекетине келеекте де бийик етимислер, сондай кызыклы шаралар коьп озгарганын йораймыз.
Г.Нурдинова.
Суьвретлерде: «Ак юректен» клубынынъ агзалары шарадынъ барысында.
