Дагестан Республикасынынъ сырт зонасы бетиндеги районларда Авыл хозяйство эм тамак-азык министерствосынынъ аьрекети мен эгиншилердинъ явы – шегертки мен куьрес юритилип турады. Сондай куьрес Ногай районы ерлеринде де бардырылады.

Бас деп район Авыл хозяйство управлениесининъ куллыкшылары ерли фермерлердинъ аьрекети мен шегертки район ерлерине киретаган Бажиган бетлерди, районнынъ сырт якларындагы 15 мынъ гектар отлакларга химикатлар септирттилер. Соны ман байланыста быйыл бу яктагы кавыфлык тайдырылган демеге болады. Буьгуьнге Куьнбатар авылдынъ сыртында шегертки йокка эсап.

Экиншилей, оьсип турган куьзлик бийдай культураларына шегертки туьспес уьшин Уьйсалган авылдынъ тоьгерегине де дарман шашылган.

Район бойынша быйыл буьгуьнлерге 32 мынъ гектар ерлер тергелген, солардынъ 17615 гектарларында шегертки барлыгы белгиленген. Баьриси солардынъ аьли уьшин 11200 гектардагы майданларына химикатлар себилген яде 19 мал пунктлары бу зарарлы душпаннан тазаланган.

Эндигиси, ДР «Россельхозцентр» Ногай районы бойынша боьлигининъ бас специалисти Сейдали Союнов айтканлай, Карагас авылдынъ кубыласындагы ерлерди шегерткиге карсы дарманламага ниет бар. Мунда 6 мынъга ювык гектар майданларды тергегенде, шегертки барлыгы аянланган. Бу ерлер «сельсовет Ортатюбинский» СП МО эсабына киредилер.

Эгин кырлардынъ явына карсы ерлерди асыллав уьшин малшылар керекли дарманларды оьзлери сатып аладылар. Дарманларды себуьв уьшин республикадынъ Авыл хозяйство эм тамак-азык министерствосы керекли техника ман канагатлайды. Районда дарман шашатаган эки КАМАЗ эм УАЗ автомашиналары ислейдилер.

М.Юнусов.