Савлайроссиялык «Ясыл Россия» экологиялык ямагат барысынынъ баславы ман «Енъуьв орманы» деп аталып, элимиздинъ калаларында, районларында акция озды. Баславшылардынъ ойы ман, савлай элимиз бойынша Уллы Аталык согысында янларын берген аьскершилердинъ эстелигине тереклер шашылмага керек эди. Сол акцияды Дагестан Республикасынынъ иш ислер министерствосы хош алып, баьри МВД боьликлерине де сол шарады озгармага деп тапшырув этти.

Ногай районы бойынша иш ислер боьлигининъ етекшилеви мен «2016-2020-ншы йылларга Россия Федерациясынынъ гражданларын патриотизм яктан тербиялав» деген патшалык программасын яшавга шыгарув ниет пен акцияды бизим район еринде озгарды. Соьйтип, янъыларда полиция куллыкшылары шоьлимиз ясыл болсын деп, Уллы Енъуьвдинъ 75 йыллыгына багыслап, юзден артык тереклер шаштылар.
«Енъуьв орманы» бизим шоьлимизде де оьседилер, сол келеектеги несилге Уллы Аталык согыстан кайтпаган аьскершилеримиз акында эстелик болып дайымларга калаяк.
Г.Бекмуратова
Суьвретте: «Енъуьв орманы» акциядынъ катнасувшылары оьз аьрекетинде.