Ногай районы бойынша авыл хозяйстволык маьнелиги болган ерлер оьлшеми 246400 гектар деп саналады, сонынъ 30646 гектары эгин кырлары, солардынъ да 6585 гектары сувгарылатаган ерлер боладылар. Аьлиги заманда районда баьриси эгин кырлардынъ 99,5 проценти, олай дегени 30630 гектары кулланылады.
2020-ншы йылдынъ онъысы уьшин 8491 гектарда куьзлик бийдайы шашылган эм йыйналган, соннан баьриси 20378 тонна аслык йыйылып алынган, аьр бир гектардан орта эсапта 24 центнер онъыс болдырылган.
Язлык аслык культуралары 3460 гектарда шашылган эм йыйналган, аьр гектардан 20 центнер онъыс алынган, баьриси йыйналган язлык культуралары 6920 тоннага етискен. Сонынъ ишинде 3100 гектардан арпа, 360 гектардан сулы, 145 гектардан ералма, 304 гектардан ясылшалар йыйналган.
Районда пишен-ем культуралары 10224 гектарда, сонынъ ишинде оьткен йыллардынъ коьпйыллык оьленлери 4150 гектарда оьстирилген, аьр гектардан орта эсапта 51,4 центнер пишен шалынып йыйылган. Оьткен йылдынъ коьпйыллык оьленлери 1150 гектарда оьстирилген. 2020-ншы йыл айлак та кургаклы болганга, аьр гектардан орта эсапта 25 центнер пишен аьзирленген. Район бойынша бирйыллык оьленлери 4924 гектарды бийлеген эм аьр гектардан 30 центнер пишен болдырылган.
Былтыр бакша культуралары районда 2015 гектарда шашылып, баьриси 40300 тонна яде аьр гектардан 200 центнер онъыс йыйылып алынган.
Солай ок озган йыл район ерлеринде 41107 тонна пишен, сонынъ эсабында 900 тонна тобан аьзир этилинген.
2020-ншы йылда районга МТЗ-82 маркалы 10 трактор, тракторга тиркелетаган бир алат, эки сеялка, доьрт сабан, эки дарман себуьвши эм бир минераллы ер семирткишлерин шашатаган алатлар сатылып алынган. Баьриси район еринде 26 трактор, 9 пресс-подборщик, 20 сабан, 15 культиватор, 17 сеялка, 3 сувгарув алатлары бар деп саналады.
Былтыр, 2021-нши йылдынъ онъысы уьшин, куьзлик бийдай культурасы 9020 гектарда шашылды. Бийдайдынъ бизим район ерине келисли, кургаклыкка шыдамлы «Петровчанка», «Таня», «Алексеич», «Иридас», «Чорнява» сортларынынъ урлыклары шашылган.
Келеяткан язлык шашув ислери район бойынша баьриси 11950 гектарда юритилмеге каралады.
Ногай районында ызгы йылларда эгиншилик тармагынынъ оьрленуьви белгиленеди.
Йыл сайын да район администрациясынынъ аькимбасынынъ токтасы ман кезекли авыл хозяйстволык куллыкларын оьткеруьвди онълав бойынша штабы туьзиледи. Оьткен йыл язлык культураларынынъ урлыклары ман район хозяйстволары 70 процентке канагатланган эди. Етпей калган урлыклар конъысы баска регионлардан сатылып алынган эм тийисли шашув кондицияларына дейим еткерилген. Баьри урлыклар да Ногай районы бойынша «Россельхозцентр» ФГБУ лабораториясында тергевди оьтеди.
Буьгуьнлерде коршаланган топыракта ясылшаларды оьстируьв аьрекети мен 7 гектар ерде «Амал» эгинши-фермер хозяйствосы каьр шегеди. Мунда ашык топыракта оьстирилетаган ясылшалар да: огурцелер, бадыржанлар, соган, пыхы, баклажанлар да асылланады.
М.Юнусов.
