Дагестан Аькимбасынынъ кесек заманга куллыгын юритуьвши Сергей Меликов республикага ис йорыгы ман келген Россия Президентиндеги предпринимательлердинъ ыхтыярларын коршалав бойынша уполномоченныйы Борис Титов пан йолыгыскан.

Йолыгыста Дагестан Республикасынынъ предпринимательлерининъ ыхтыярларын коршалав бойынша уполномоченныйы Мурад Далгатов катнаскан.
Конакты дагестан еринде йылы йолыга берип, Сергей Меликов: «Бизим алдынгы баьри йолыгысларымыз да Сырт-Кавказ округынынъ субъектлери уьшин маьнели карарлар алувымыз бан тамамланган. Буьгуьн сондай карарлар республика уьшин бек керекли», – деген.
Борис Титов оьткен йыл пандемия бизнестинъ оьрленуьвине оравлыклар тувдырганы акында айткан. Буьгуьнлерде, онынъ соьз- лерине коьре, аьллер туьзелгенлер эм эндиги келеектинъ акында ойлав керегеди. «Биз сизге бир неше ой-ниетлеримиз эм кенъеслеримиз бен келгенмиз, солар акында маслагатласпага эм респуб- ликада производстволык киши бизнести оьрлентуьв акында ойласпага боламыз. Солар экономикады оьстируьв уьшин негиз болар эди», – деген Борис Титов.
Сергей Меликов оьз ягыннан буьгуьнлерде предпринимательстводы оьрлендирмей, социал-экономикалык коьрсетимлерди ийгилендируьв исимизде уьстинликлерге етисип болмаякпыз деп белгилеген.