Уьстимиздеги йылдынъ казан айынынъ 29-ншы куьнинде белгили ногай суьвретшиси Сраждин Батыровтынъ «Элгезер» деген выставкасы Ставропольдинъ патшалык Г.Н. Прозрителев эм Г.К.Праве атындагы музей-заповеднигинде ашылды. Выставка ногай суьвретшисининъ 70 йыллык мерекесине багысланган. Ставрополь каласына П.С. Гамзатова атындагы Дагестаннынъ суьврет ясав саниятынынъ музейиннен суьвретлер коллекциясы биринши кере аькелинген. Баска болып, выставкадынъ уйгынлавында Тахо-Годи атындагы Дагестан Республикасынынъ миллет музейи эм Терекли-Мектеб авылындагы С.Батыров атындагы балалар саният мектеби де ортакшылык эттилер.

Выставкадынъ ашылувына П.С.Гамзатова атындагы Дагестаннынъ суьврет ясав саниятынынъ музейининъ куллыкшылары, айтпага фондлардынъ бас саклавшысы Х.Амирханова, реставраторшы А. Гаджиннаев, Ставрополь крайы бойынша маданият министерствосынынъ ваькили К. Манякина, ваькил орынбасары В.Новиковтынъ етекшилеви мен Ставрополь крайы бойынша Дагестан ваькиллигининъ аьрекетшилер куьби, Россия Суьвретшилер союзынынъ Ставрополь крайы боьлиги бойынша правление председатели, Россия художестволык академиясынынъ агзасы С.Паршин ортакшылык эттилер. Х.Амирханова йыйылганларды выставкага салынган суьвретлер мен таныстырды. Выставкадынъ ашылувында йыйылганлар оьзин элгезер деп атаган Сраждин Батыровтынъ акында коьп кызыклы затлар эситтилер. Олар суьвретшидинъ уьйкен оьнери болганы, солай болып, ол оьзи этнограф, фольклоршы, анъшы, хореограф, шаир, актер, миллет кийимин ярастырувшы, туьзуьвши, китапти суьврет пен кеплендируьвши болып келгени акында билимлерин кенъейттилер.
Сраждин Батыровтынъ савлай суьвретлерининъ саны 200-ге ювык болады. Выставкада онынъ ызгы иси – «Древо жизни» деген суьврети де салынган. Оьнерли суьвретши живописьтен баска болып, биринши «Айланай» фольклор-этнографиялык биюв ансамблининъ туьзуьвшиси де болады. Ол бас хореограф эм онынъ биюв катнасувшыларына кийимди туьзуьвде уьлиси бек уьйкен. «Айланай» ансамбли Сырт Кавказда да, элимиздинъ баска туьрли муьйислеринде эм шет эллеринде коьп ерлерде гастрольлер мен болып кеткен. Ансамбль коллективи буьгуьнлерде де С.Батыров пан туьзилген кийимлер кийип бийийдилер. Солай болып, ол «Лезгинка», «Вайнах» деген патшалык биюв ансамбльлери уьшин кийимлерди ойлап шыгарган. Ол ногай халк саз алатларында етимисли ойнаган эм солай болып, оьнерли йырлап та билген. Онынъ суьвретлеринде ногай миллет аьдем келпети, айтпага, куллыкшылар, шаирлер, илми аьрекетшилери, врачлар уьйкен орынды тутадылар. Суьвретлерден баска, экспозициялар арасында ногай халкынынъ XIX–XX оьмирлериндеги туьрли куьмис ярасыклавлары да ерлестирилгенлер.
«Элгезер» деген выставкасы Ставрополь каласындагы патшалык Г.Н. Прозрителев эм Г.К.Праве атындагы музей-заповеднигинде караша айынынъ 27-нши куьнине дейим оьтти.
Г.Нурдинова.
Суьвретте: выставкадынъ ашылувыннан коьринис.