Енъуьв Куьни – ол юректеги кайгы ман куванышты, коьзяслар ман халкымыздынъ Тувган Элимиздинъ эркинлиги эм тынышлыгы уьшин коьрсеткен йигитлигине оьктемликти бирге косатаган айырым байрам. Сол куьн, 9-ншы Майда, Уллы Аталык согысында совет халкынынъ немец-фашист Германиясын енъуьвининъ 78 йыллыгына багысланып, Ногай район орталыгы Терекли-Мектеб авылында байрам шаралары болып оьткен.
Коьптеги аьдетке коьре, эртенъги шакта районнынъ ис коллективлери ногай халкынынъ Баьтирлер Аллеясындагы эстеликлерге шешекей байламларын салдылар.
Байрам шарасы дав йылларында янын берген ердеслердинъ эстелиги янында Кадрия атындагы окувшылардынъ согыста катнаскан фронтлардынъ байракларын коьтерип юруьвиннен басланды.
Район яшавшыларын Енъуьв байрамы ман район аькимбасы Джамалутдин Эсиргепов кутлады. Онынъ айтувы ман, Уллы Аталык согысында душпанды енъуьвде халкымыздынъ баьтирлери Халмурза Кумуковтынъ, Алимхан Асановтынъ, Ахмат Сулеймановтынъ, Кошманбет Кидирниязовтынъ эм коьп баскалардынъ уьлиси де барлыгы ман биз айырым оьктемсиймиз. «Меним атайым Шавдир Эсиргепов, айтпага, Сталинград областинде согыскан. Соьйтип, элимиздеги баьри де халклардынъ ортак катнасувы ман Уллы Енъуьвимиз бизге келген. Тек, оькинишке, буьгуьнлерде фашизм тагы да Украинада басын коьтерген. Тагы да, оьз атайларындай болып, эндигиси олардынъ уныклары эм немерелери элимиздинъ эркинлигин эм бойсынмаслыгын коршалайдылар», – деп белгиледи район етекшиси.
Солай ок район яшавшыларын Ногай районынынъ Депутатлар йыйынынынъ председатели Рустам Байманбетов та кутлады. Онлаган йыллар оьтсе де, халкымыздынъ оьлимсиз йигитлиги акында эстелик, дуныядынъ келеектегиси тынышлы болар деген сенимлик пен, ердеги баьри де аьдемлердинъ юреклерин йылытады деп белгиледи район Депутатлар йыйынынынъ етекшиси.
«Заман биревди де аямайды, биз дайым да согыстан кайтпаганларды эм эндигиси арамыздан кеткен дав ветеранларын эсимизде оьмирлерге сакламага керекпиз», – деди район согыс, ис, Савытлы куьшлер эм ыхтыяр саклавшы органларынынъ ветеранлар советининъ председатели Акманбет Сангишиев. Ол Енъуьвге район яшавшыларынынъ коскан уьлисин айырым белгиледи.
Байрам митингте солай ок район яшавшыларын ДР Халк Йыйынынынъ депутаты, КПРФ Дагестан обкомынынъ секретари, КПРФ Ногай РК 1-нши секретари Мурзадин Авезов, СВО катнасувшысы, тамада лейтенант Алимбек Доржиев, Нариман авылдан СВО-да ортакшылык этетаган агалы-инили Абдулбариевлердинъ анасы Гульфира Абдулбариева, ерли аьскер боьлигининъ командирининъ кесек заманга куллыгын юритуьвши Семен Сафронов, авиацияды онълайтаган пунктынынъ начальнигининъ куллыгын кесек заманга юритуьвши Юрий Коровин кутладылар.
Ис коллективлерининъ ваькиллери эстеликке шешекей байламларын салдылар, сонъ уьндемев такыйкасы шагында эли уьшин янын бергенлерди эскердилер.
Митингтен сонъ, патшалык ногай халк саз алатлар оркестрининъ меканынынъ алдында уьйкен байрам концерти болып озды.
Ерли аьскер боьлигининъ казаншылары баьрисин де солдат уьйреси мен сыйладылар.
Байрам программасы бойынша стадионда спор ярыслары, кеште Уллы Енъуьвдинъ сыйына фейерверк атувлары болып оьтти.
Бизим хабаршы.