Ногай районында мектебке дейим билимлендируьв учреждениелерининъ 2022-2023-нши окув йылына куллыгынынъ планын яшавга шыгарув мыратта Ана тилининъ куьни бойынша ногай тилинде эртегилер инсценировка конкурсынынъ муниципаллык кезеги оьтти. Шарады билимлендируьв боьлиги уйгынлады. Боьликтинъ методисти Нурбике Кельдасова жюри агзалары Ногай районынынъ балалар бавларынынъ куллыкшылары эм саьбийлери аьзирлеген эртегилер инсценировкасын компьютер аркалы карап, белги беруьв алдында конкурс акында айтып озды. Ол жюри агзаларына аьр бириси оьз кесписи ягыннан белги бергенин тиледи. Балалардынъ оьнерине белгиди Кадрия атындагы мектебининъ ана тилининъ эм адабиатынынъ, солай ок баслангыш классларынынъ окытувшылары Насипхан Хасбулатова эм Эльмира Абубекерова, «Шоьл тавысы» республикалык газетасынынъ корреспонденти, РФ Журналистлер союзынынъ агзасы Нурият Кожаева, Халк яратувшылык орталыгынынъ фольклор бойынша специалисти Гюльгерен Савкатова эм художестволык етекшиси Бурлиянт Курманова бердилер.
Бу конкурста Ногай районынынъ 8 балалар бавлары ортакшылык эттилер. Конкурс сырагылары бойынша 1-нши орынды Терекли-Мектеб авылындагы «Айсылув» балалар бавы казанды. Бу балалар бавынынъ тербиялавшысы Т.Дуйсембиева оьз тербияланувшылары ман «Буршак кыз» эртегисин аьзирлеген. 2-нши орынга Терекли-Мектеб авылындагы «Юлдыз» эм Червленные Буруны авылындагы «Кызыл-Гуьль» балалар бавлары тийисли этилиндилер. «Юлдыз» балалар бавынынъ балалары «Юмсак кирпи» тербиялавшы А.Ханмурзаева язган эртегисин коьрсеттилер. Автор бу эртегиде балаларды татымлыкка усташа шакырады эм тербиялайды. «Кызыл Гуьль» балалар бавынынъ тербиялавшысы Н.Шоматова етекшилиги мен балалар «Коразды оьлимнен куткарган тавык» эртегисин аьзирлегенлер. Тавыктынъ ролин ойнаган Салима Муталимова ийги оьнери уьшин Сый грамота ман савгаланды. 3-нши орынга Нариман авылындагы «Шолпан» (эртеги «Дюймовочка» тербиялавшы А.Асанова), Терекли-Мектеб авылындагы «Ногай Эл» (эртеги «Тай ман боьри» тербиялавшы К.Айтувганова) балалар бавлары тийисли этилиндилер. Бас деп балалар бавларынынъ тербиялавшыларына уьйкен разылыгымызды билдиремиз балаларда ана тилине суьйимди тербиялав уьстинде куллык этетаганлары уьшин. Тил маьселеси аьлиги заман айлак оьткир турады. Саьбийлерге кишкей заманнан алып ана тилининъ маьнелигин, кереклигин коьрсетуьв керек. Тек куьндегилик арымай-талмай биргелес куллык этуьв аркалы биз тилимизди, соны ман халкымызды да саклармыз.
Н.Эрежепова.
Суьвретте: Буршак кызды ойнаган Марьям Нукаева.