Янъыларда Кизляр районынынъ аькимбасы Аким Микиров Россия МВД Кизляр районы бойынша боьлигининъ етекшисининъ кесек заманга куллыгын юритуьвши Амирбег Джабраилов эм сондай баскалар ман согыс спецоперациядынъ барысында яны курман болган аьскерши Шамиль Ибрагимхалиловтынъ аьелинде конакта болып кетти. Олар офицердинъ кардаш-тувганларына Аталыктынъ шынты увылынынъ дуныядан тайганы ман байланыста кайгырувын билдирип, бассавлык йорадылар. Аким Микиров Заира Абдулаевнага увылы аьскершилик борышын толтырувда коьрсеткен йигитлигин, солай болып берилген антына алаллыгын белгиледи.
– Шамиль шынты йигитликтинъ уьлгисин, Элине алаллыгын коьрсетип, баьтирлерше согысты. Ердесимиздинъ ян беруьви акында сувык хабар юрегимизди дертке толтырды. Ол толтыргысыз йойым, биз де сизи мен бирге кайгынъызды боьлемиз. Шамиль Кизляр районынынъ яшавшылары уьшин дайымга баьтирлик эм коркынышсызлыктынъ уьлгиси болып калаяк, – деди Кизляр район аькимбасы.
Оьзининъ аьскершилик борышын толтырувда Элининъ кавыфсызлыгын канагатлавда яшавын курман эткен шынты баьтирдинъ сапатлары акында Амирбег Джабраилов та айтты:
– Шамиль оьзи уьшин Аталыкты саклавдынъ тыныш болмаган асыл йолын сайлаган. Биз дайым да онынъ акында эсимизде саклаякпыз! Куьш эм шыдамлык сизге! Шынты патриотына дайымлык эстелик!»
Заира Абдулаевна район аькимбасы эм район полиция боьлигининъ етекшиси мен кенъесуьвде увылы оьзин бала шактан алып аьскерши этип коьргени акында хабарлады: «Шамильге Уллы Аталык согысынынъ катнасувшысы, Берлин каласына дейим еткен атасы дайым уьлги болып келген. Мектебте окыган заманыннан алып оьзин аьскерге аьзирлеген. Ястынъ баьри кызыксынувлары да аьскерлик иси мен байланыслы болган эм кеспиди де ол Элин коршалавга келистирип сайлаган эди. Ызгы хабарласувымызда, онынъ отпускы болган саялы, мен ога уьйге кайтканын тиледим. Ол согыс майданында йолдасларын ялгыз калдырмага суьймейтаганын билдирди. Анасы офицер яшаган орамына, онынъ атын бермеге деп, увылынынъ атын оьмирлетуьвининъ соравын карамага район аькимбасына билдирди.
Шамиль Кизляр районынынъ Южное деген авылында тувып оьскен. Мектебти тамамлаган сонъ яс аьскер сырасына йолланды. Аьскерлик училищесин, оннан сонъ лейтенантлык школасын тамамлаган Шамильди зенит-ракеталык боьлигине шакырдылар. Ол Калининград областинде контракт бойынша службасын оьткен. Оннан ясты согыс спецоперациясы оьткен ерине йибердилер. Кизляр районынынъ Южное авылыннан Ибрагимхалиловлардынъ аьели Россия аьскерининъ киши офицери Шамиль Ибрагимхалилович Ибрагимхалиловтынъ ян бергени акында кайгылы хабарын алганына эки айдан артык болады. Куьнбатар аьскершилик округынынъ Балтийский флотынынъ армейский корпусынынъ мотострелковый батальонынынъ мотострелковый ротасынынъ командири алдышылыкта Харьков областинде янын курман этти. Шамиль эм онынъ ротасы Граково каласын нацистлерининъ атувыннан коршалап келгенлер. Шамильди йолга салмага онынъ кардаш-тувганлары, дослары, авылдаслары эм оны ман бирге службасын бардырган йолдаслары келген эдилер. Йигит ястынъ йолдаслары Шамиль акында анасына хабарлаганда, олар командирининъ алдышылыкта коркынышсызлыктынъ эм йигитликтинъ уьлгиси болып калмай, оьлимнен оьзи мен йолдасларын коьп кере япкан, олардынъ акында каьр шеккен ата да болып келген. Шамиль Ибрагимхалиловка 38 яс эди. Онынъ эки аьвлетлери оьксиз калдылар.
Ол аьели мен Калининград областининъ Гусево каласында яшайтаган эди. Аьскерлик службасындагы етимислери уьшин ол коьп кере савгаларга, орденлерге тийисли этилген.
Суьвретте: Ш.Ибрагимхалилов.