Россиядынъ Язувшылар союзынынъ миллет адабиатлар бойынша Совети 2022-нши йыл 1-нши январьден алып декабрь айынынъ сонъына дейим «Эсит, Россия, бизим тавысларды!» деген РФ халклар тиллериннен яратувшылык коьшируьвининъ 3-нши конкурсын оьткерген. Конкурста эки номинация болган: «Поэзияды коьшируьв» эм «Прозады коьшируьв» деген.

Жюри конкурстынъ тамамын да келтирген. «Поэзияды коьшируьв» номинациясында 1, 2, 3-нши орынлар тийисли этилинген экен. Сырагысында 1-нши орын эки коьшируьвши Нина Поповага эм Дина Немировскаяга берилген. Олар Россиядынъ Язувшылар союзынынъ лауреатлары да болганлар. Айтып озайык, Дина Немировская белгили ногай язувшы, Дагестаннынъ халк поэти Анварбек Оьтей увылы Култаевтинъ ятлавлар циклин орыс тилине коьширген эм Москвадагы «Литературная Россия» газетасынынъ бетинде оьткен йыл ноябрь айында баспалаган. Ол, соьзсиз де, ногай поэзиясына этилинген уьйкен абырай эм сый.
Бизим ойымызга коьре, Дина Немировская эндиден армаган да ногай шаирлерининъ асарларын коьширер эм ногай поэзиясын Россия еринде белгили этуьв уьшин талабын аямай салар.
Бизим хабаршы.