Савлай Элимиз ызгы занъ байрамын белгилейди.
Уьстимиздеги курал айдынъ 23-нши куьнинде Кумлы авылынынъ Д.М.Шихмурзаев атындагы орта мектебининъ выпускниклери уьшин ызгы занъ согылды. Бу йыл мектеб уьйкен яшав йолына оьзининъ тогызыншы классты тамамлаган 11 окувшысын йолга салды. Шара орыс тил эм адабиаты бойынша дерисиннен окытувшы А.Картакаевадынъ етекшилиги астында озды. Байрам линейкада выпускниклердинъ мектеб пен шатлыклы аманласувында Кумлы авыл администрациясынынъ аькимбасынынъ орынбасары Джалиль Бегалиев, Кумлы авыл орта мектебининъ етекшиси Кошбике Нукаева, шарадынъ сыйлы конагы, Яшавшыларды куллык пан канагатлав Ногай район орталыгынынъ етекшиси Рустам Такташев, баска болып выпускниклердинъ ата-аналары, авыл яшавшылары ортакшылык эттилер.
Байрам шарады кутлав соьзи мен Кошбике Нукаева ашты. Ол йыйылганларды выпускниклер патшалык сынавларын оьтееги бойынша буйрыгы ман таныстырды. Солай болып, ол выпускниклерге сынавларды етимисли оьтпеге, оьз куьшлерине сенгенин, келеектеги кесписин дурыс сайлаганын йорады. Баска болып мектеб етекшиси окувда уьстинликлер коьрсеткен, мектебтинъ ямагат яшавында белсенли катнаскан выпускниклерге Сый грамоталарын тапшырды. Оннан сонъ мектебти тамамлаган окувшыларга йылы йоравларын шара конагы, Рустам Такташев, Джалиль Бегалиев, выпускниклердинъ биринши окытувшысы Фарида Менлиалиева, класс етекшиси Зульфира Сатырова, ата-аналар атыннан Оразали Теминов, Кумлы авыл маданият уьйининъ етекшиси Альфия Аджибатырова багысладылар. Авыл маданият уьйининъ етекшиси Альфия Аджибатырова авылдынъ яратувшылык яшавында белсенли катнаскан кайбир выпускниклерин Сый грамоталары ман белгиледи. Баска болып, выпускниклер коьп йыллар бойы оьз билимлерин савгалап келген окытувшыларга, ата-аналарга йылы разылык соьзлерин багысладылар.
Сонъгы вальс биюви эм ызгы занънынъ согылувы байрам шарадынъ энъ маьнели эм юректи телезиткен кесеги болды. Ызгы занъды сокпага 9-ншы класс окувшысы Нилюфер Теминовага эм 1-нши класс окувшысы Ясмина Бегалиевага ыхтыяр берилди.
Сол ызгы занънынъ байрамы аьр бир мектебти тамамлаяк окувшыдынъ эсинде ярык эм суьйинишли эстелик болып сакланаягына соьз йок.
Г.Нурдинова.
Суьвретте: шарадан коьринис.