Социаллык куллыкшысы аьрекетин, кесписин кайратлы, оьз исине алал, касындагы аьдемге яны авырыган аьдемлер сайлайдылар. Олар оьзлери карайтаган аьдемлерине уьйкен сый этип, эс берип карайдылар. Социаллык куллыкшылары ман ясуьйкенлердинъ уьйлери ярык сенимге толады. Кайсы ясуьйкен аьдем де социаллык куллыкшысын энъ сыйлы конагындай этип саклайды эм суьйинишли йолыгады.

Элимизде, сонынъ ишинде Ногай районында да социаллык куллыкшысынынъ кесписи бойынша коьплеген аьдемлер куллык этип келедилер. Олар ис аьрекети бойынша коьмек керексинетаган ясуьйкен аьдемлери акында каьр шегедилер. Олардынъ ис аьрекети социаллык ягыннан демевлик керек аьдемлерге яшамага, уьстинликке, ийгиликке сенмеге ярдамласадылар.
Кумлы авылынынъ яшавшысы Зумруд Аблеевна Исаева 1993-нши йылдан алып социаллык службасынынъ тармагында Ася Болатовадынъ етекшилиги астында етимисли аьрекет этип келеди. Буьгуьнлерде Зумруд Аблеевна аьвлетлери алыс сырт якларга куллык этпеге кеткен, ялгыз яшаган яде ярдам керексинетаган тогыз ясуьйкенлерининъ уьйлеринде болып, колыннан келген коьмегин, юрек йылувлыгын, юмартлыгын аямай берип келеди. Сол ясуьйкенлердинъ бириси Кумлы авылынынъ сыйлы ис ветераны Аминат Муслимовна Кожаева болады.
– Мен Кумлы авылынынъ ясуьйкен яшавшысы, пенсионер, ис ветераны боламан. Мине доьрт йыллар узагы социаллык куллыкшысы Зумруд Аблеевна меним артымнан карап келеди. Зумруд уьйкен аьриптен, танъ, куллыксуьер аьдем болады. Ялгыз болган ясуьйкен аьдемге эс, коьмек керек. Ол аьр келгенде мени мен олтырып хабарлап, ден савлыгымды сорайды, мени уьйкен эс берип тынълап, ийги соьзи мен коьнъилимди авлайды, келуьви мен уьйимнинъ сынын аькеледи. Зумруд уьйимди йыяды, асымды асады, кийимлеримди ювады, ерлестиреди, туькеннен азык-туьлик аькеледи. Янъыларда меним суьйикли «Лечо» салатымды да этип аьзирлеп берди. Мен Зумрудтынъ мага йылы караганы, эс берип келгени уьшин, уьйкен аваслык пан, янын салып, эткен куллыгын яваплы толтырып келгенине бек разыман.
Мен районымызда социаллык службасынынъ аьрекет этуьвин бек хош коьремен. Сол социаллык службасынынъ аьрекетшиси Зумруд Исаевага уьйкен шыдамлыгы, юмсак юреги, ясуьйкенлерге тийисли эс каратып келгени, салып келген кыйыны, иси уьшин ак юректен уьйкен разылыгымды билдиремен. Берк ден савлык, узак оьмир, куллыгында бийик етимислер сагынаман.
Суьвретте: Зумруд Исаева оьз ис аьрекетинде ясуьйкен Аминат Кожаевадынъ уьйинде.