Бизим авыл Терекли-Мектеб деген атын шынтылай да аклайды. Юз йылдынъ артында пристав Филипп Капельгородский мен шашылган тереклер буьгуьнлерде бизим паркта иссиликте салкынлыкты тутадылар. Бизде тек иссилик тувыл, куьшли еллер де боладылар, сол заман тереклер сынадылар, уьйкен бутаклар туьсип, парктынъ ишинде ятадылар, йолларды ябадылар, электротеллерде кабадылар, халкты ярыксыз, Интернетсиз калдырадылар. Сол заман бизге коьмекке электриклер келедилер. Подстанцияды Рамиль Муслимов етекшилейди.

Ярастырув куллыкларды этетаган куллыкшылар специальли коьликлер мен келедилер, олардынъ пышкылары, коршаланув амаллары болып, илинип турган бутакларды пышадылар. Соьйтип ислегени уьшин мен ярастырув ислерининъ бригадасына Каирбек Муталимовка, Амирхан Эльмурзаевке, Камиль Атангуловка, Руслан Отовалиевке уьйкен савбол айтаман. Кумлы еллерден сонъ бизим электриклерде куллыклар айлак коьп, олар оьз куллыкларын яваплылык пан толтырадылар.

Л.Жукова,
Терекли-Мектеб авыл яшавшысы.
Суьвретте: Ногай район подстанциясынынъ ярастырув бригадасы.