Бу бек уьйкен маьнелиги бар Савлайроссиялык шара негизинде элимиздинъ алдыдагы йылларга социал-экономикалык оьрленуьви байланыслы, сол шара сырагысында элимиздеги социал- экономикалык аьл тергеледи, демография ман байланыслы маьселеге артык эс каратылады.

Элимиздинъ сырт эм баска регионларында , туьрли аьрекет пен каьрлеп, яшав оьмирин бардыратаган ердеслеримиз , бу халк санын язув исине маьне берип, оьз аьелининъ баьри агзаларын ногай деп яздырганы да уьйкен орын тутады. Соны ман биз, кишкей ногай халк, оьз сыйымызды арттырамыз.
Халк санын язув ислеринде белсен катнасув ман яшавга шыгарылаяк туьрли программалар эм проектлер белгилевге демевлик этиледи.
Аьлиги йогары технологиялык оьмирде бюллетеньди Интернет аркасы ман толтырмага ыхтыяр берилген.
Бу бек яваплы патшалык шарага маьне бермеге шакырамыз.
Л.УРАЗАЕВА, журналист («Шоьл тавысы» республикалык газетасы).