Ногай районынынъ Терекли-Мектеб авылында, маданият уьйининъ меканынынъ алдында, хатын-кызлардынъ байрамына багысланган концерт шатлыклы аьлде оьтти. Бир йылдан бери созылып турган карантин битип, район яшавшыларына биринши шара оьткерилди. Концертти Ногай районынынъ аькимбасы М.Аджеков ашты эм яшавшыларды байрам ман кутлады. Ол оьз соьйлевинде хатын-кызлардынъ орыны маьнели экенин белгилеп, олар дуныяды ийги, ярасыклы этедилер деп айтты.

– Буьгуьнлерде Ногай ра- йонында белсенли, бажарымлы хатын-кызлар ислейдилер, оьз оьнерин, ийги исин коьрсетедилер. Эр кисилер мен бирге хатынлар яваплылык пан керекли эм маьнели борышларды толтырадылар, олар аьел ошагын бир заманга да тымдырмай, тоьгеректегилерге йылувлык эм суьйим себедилер, – деди ол.
Солай ок хатын-кызларды Терекли-Мектеб авыл аькимбасы Зейдулла Аджибайрамов, Ногай районынынъ Ямагат палатасынынъ председатели Эльмурза Саитов эм организациялар етекшилери кутладылар. Язлык байрамына багысланган концертте «Айланай» патшалык фольклор-этнографиялык ансамбли, патшалык драмалык театрынынъ артистлери, патшалык саз алатлар оркестри, маданият куллыкшылары катнастылар.