Язлыктынъ келуьви мен, тоьгерек як янланып баслайды. Куьннинъ коьзининъ йылы саьвлелери ерге етип, баьри затты йылытады. Курт-кумырска, ян-янувар баьри де уйкыдан уянады, янъы яшав басланады. Мине сол аьлемет заманды бизим ата-бабаларымыз янъы йыл келди деп эсаплаган. Йыл басы деп Навруз айы саналган. Навруз язлыкты данъклайды, аьдемлерди яхшылыкка, тил бирликке шакырады.
Навруздынъ келуьви йыл сайын Ногай районынынъ авылларында коьтеринъки коьнъилде белгиленеди. Бу йыл да ийги аьдет бойынша Терекли-Мектеб авылында авыл администрациясынынъ эм маданият боьлигининъ уйгынлавы ман Наврузга багысланган уьйкен байрам оьтти. Байрам куьн карт та, яс та, соны ман бирге балалар да Халк яратувшылык орталыгынынъ меканынынъ алдындагы майданга шыктылар. Куьннинъ коьзининъ оьз саьвлелерин аямай савкатлавы да байрамнынъ ийгилигин арттырды, юреклерди суьйинишке каплады. Мине ярасык терме курылган, онынъ касындагы туьрли ногай зияпетлерине толы сыпырага конаклар шакырылып сыйландылар.
Байрамды ашпага Ногай патшалык фольклор этнографиялык «Айланай» ансамблининъ артистлерин шатлык юритуьвшилери Бурлиянт Курманова ман Гюльгерен Савкатова ортага шакырдылар. Ярасык кызларымыз берекетке толган тепшеклер мен шыгып, йыйылганларга боьрек, бавырсак, каьмпетлер пайладылар. Солай ок байрамда халк алдына Ногай халк саз алатлар оркестрининъ солистлери шыгып йырладылар, «Карлыгаш» балалар биюв ансамблининъ катнасувшылары бийидилер, Сраждин Батыров атындагы саният мектебининъ «Юлдызлар» ансамблининъ катнасувшылары домбырада ойнадылар, «Дагестаннынъ яны» баргысынынъ лауреаты Роза Колебаева «Уьш балапан» йырын йырлады. Байрамда конаклар да ортакшылык эттилер: Червленные Буруны маданият уьйининъ етекшиси Феруза Аманкаева, Карасу авылыннан Равхан Савкатова эм Куьнбатар авылыннан окувшы Диана Муслимова.
Навруз балалардынъ байрамы деп те айтылады. Сога коьре, бу куьн балаларга бек коьп ойынлар, конкурслар уйгынланды. Олар уьйкен кызыксынув ман ногай юмакларын шештилер, куьплерге боьлинип аркан тарттылар, табан-тирес ойында базластылар. Байрам барысында аукцион озгарылды, ортага биюв суьювшилер «Лезгинка» бийимеге шакырылдылар. Ойынларда, базласларда оьзин коьрсеткен, юмакларды шешкен аьр бирев бу куьн савкат алып кайтты.
Навруз байрамынынъ бурынгы белгиси – от. «Оттынъ уьстиннен каргыган аьдем, баьри яманлыктан тазаланады», – деп бурын санаганлар. «Озган йылдынъ яманлыгы – авырувлар, отта янсын эм янъы йылга коьшпесин», –деп каргыганда айтканлар. Соьйтип, бу куьнги аьлемет байрам от ягув ман тамамланды.
Шоьлимизге янъы йыл – Навруз бан берекет, онъайлык, татымлык, тил бирлик мол болып келсин эм куьннен-куьнге артсын.
Н.Кожаева.
Суьвретте: байрамнынъ шатлыклы шагы
