Буьгуьнге дагестан радиовещаниединъ баскалыгы – онынъ коьп тиллиги. «Дагестан» радиосы Россиядынъ 14 констиционлык тиллеринде соьйлейди: орыс, лезгин, авар, даргин, кумык, лак, табасаран, еврей, ногай, рутул, агул, цахур эм баска дагестан тиллеринде. Коьп миллетли Дагестан уьшин ол – уьйкен оьктемлик, неге десе авыл ерлериндеги яшавшылары уьшин дагестан радио янъылыклары информациялардынъ ялгыз бир булагы демеге болаяк.
Белгилев керек, дагестан радиосынынъ аьлеметлиги тек онынъ коьп тиллигинде тувыл. Онда коьплеген звукозапись экземплярлар эсабында бай эм раритетли фонотека бар. Онда республикадынъ белгили артистлерининъ сеслерин, салынган спектакльлерди, балалар уьшин радиоберуьвлер эм коьплеген баска затларды таппага болады. Бу баьри зат оьткен оьмирдинъ 50-нши йыллардынъ сеслери мен раритетли деп айтпага болады. Республика орталыгындагы Радио уьйинде музей де бар, онда боьтен де баалы эски пластинкалар эм суьвретлер.
Коьп миллетли Дагестан радиовещание тармагы куллыкшылары арасында ногайлар да бар. Дагестан радиосынынъ ногай боьлигининъ биринши етекшиси Анвар-Бек Култаев болган. Сол заманда онынъ тири сес пен радио эфиринде биринши хабарласувы берилген Ногай район партия комитетининъ биринши секретари Динислам Юсупович Адисов пан болган.
Ногай радиовещание негизин туьзуьвде «Шоьл тавысы» республикалык газетасынынъ корректоры Азинет Башиева да турган. Сол заманда Сары-Су, Главсулак эм Ногай, Кизляр, Бабаюрт, Тарумовка районларынынъ яшавшылары ногай радио эфириннен биринши диктор Азинет Башиевадынъ аьлемет сес эситуьвди аьсиретли куьтип туратаган эдилер. Оны олардынъ разылык хатлары шайытлай эди.
Айтув керек, Азинет Башиевадынъ коьп йыллар бойы «Шоьл тавысы» газетасынынъ редакциясында куллык эткен журналист Рашид Ораковтынъ (яткан ери еннетли болсын) Ногай район яшавшылары уьшин эфирден ерли радиоберуьвлери янъылыклар булагы эсабында болган.
Коьп миллетли радиовещание тармагынынъ ногай боьлигининъ куллыкшыларын 95 йыллык мерекеси мен ак юректен кутлаймыз, оьз радиоберуьвлери мен радио тынълавшыларды кызыксындырып турганды йораймыз.
Буьгуьнде де коьп миллетли Дагестан радиовещание тармагынынъ ногай боьлиги Анвар-Бек Култаевтинъ эм ДР-нынъ ат казанган маданият куллыкшысы, «Шоьл тавысы» деген ана тилимиздеги телеберилистинъ авторы эм юритуьвшиси Зафира Магомедовадынъ аркасы ман оьз аьрекетин уьстинликли бардырады.
Л.Эльгайтарова.
Суьвретлерде: А.Башиева (солда) эм З.Магомедова.
