Сыйлы окувшылар, окытувшылар эм ата-аналар!

Билимлер куьни эм янъы окув йылынынъ басланувы ман баьринъизди де кутлайман! Бу байрам шатлыклы эм юрек телезиткен йыл оьзгерислерининъ бириси болады, сол куьн баьри несиллерге де баалы, янъы дуныяга эм амалларга ярык капыды ашады. Сонынъ акында ийги эскеруьвлер бизди сав яшавымыз бойынша йылытадылар, яхшы ислерге даьвлендиредилер, яшавымыздынъ кыйынлы такыйкаларында бизге сенимли тирев боладылар. Ал деп оьз яшавында биринши кере 1-нши класска бараяткан балаларды кутлайман. Олар уьшин буьгуьн биринши мектеб занъы согылады эм сол алдыга, янъы ярык етимислерге, яваплы ислерге шакырады. Выпускниклер уьшин буьгуьн яшавда армаган аькетеек йолларын белгилейтаган йыл басланады. Окытувшыларга янъы кеспи уьстинликлерди, каьмбилликти, окувшыларынынъ суьйимлигин эм сенимлигин казанганды, окувшыларга – ис суьерликти, алдына салган мыратларына етисуьвде оьмезликти, ийги белгилерди, ата-аналарга – шыдамлыкты, оьз балаларынынъ етимислерине эм енъуьвлерине куьезленгенин йорайман. Сизинъ баьри ниетлеринъиз де толсын, аьр биринъизге – наьсип, берк ден савлык, таьвесилмес куват, оьз куьшинъизге сенимлик эм яшав белсенлигин сагынаман.ДР Халк Йыйынынынъ депутаты М.Авезов.

Баалы окувшылар эм студентлер! Сыйлы окытувшылар эм окытувшылык исининъ ветеранлары!

Сизди янъы окув йылдынъ басланувы ман эм билимлер куьни мен кутлайман! Бу куьн биринши кере мектеб эсигине абытын басатаган окувшыларга уьйкен байрам болады. Мектебте оларды алал дослар эм акыл береек окытувшылар куьтедилер. Олар билимлендируьв дуныясына кирип, коьп янъылыкларды билееклер, етимислерге, уьстинликлерге етисип, оьзлерининъ енъуьвлери уьшин оьктем болган куьнлери де коьп болаяк. Кеспи алмага ниетленген яслар болса, бу куьн оьзлери сайлаган йогары, орта окув ошакларынынъ эсиклерин ашып, яшавлары бойынша бардыраяк ис аьрекетининъ сулыпларын аладылар. Бу куьн – уьйкен байрам окытувшыларга, тербиялавшыларга эм билимлендируьв тармакларында ис аьрекетин бардыратаган административли эм технический куллыкшыларга да. Сиз оьзинъиздинъ билиминъизди, юрегинъиздинъ йылувлыгын балаларга берип, оьсип келеяткан несилди тийисли аьлде тербиялап, яшав баалыкларын коьрсетпеге куьш саласыз. Ак юрегимнен окувшыларга мектеб яшавынынъ яркын бетлерин ашып, окувда етимислерге етискенди йорайман. Окытувшыларга – шыдамлыкты, алдыларына салган мыратларына етисуьвде беркликти сагынаман. Ата-аналар болса, оьзлерининъ балаларынынъ етимислери мен оьктемсип, оларда бар талапларды ашыкламага коьмеклерин этсинлер. Янъы окув йылы баьрине де пайдалы эм кызыклы болсын!

«Ногайский район» МР аькимбасы Д.Эсиргепов.