Уьстимиздеги йылдынъ курал айынынъ 5-нши куьнинде Ногай районынынъ орталык маданият уьйинде профсоюз ошаклары, айтпага, мектеблер эм балалар бавларынынъ хор коллективлери арасында «Биз Уллы Енъуьвге яратувшылыгымызды багыслаймыз» деген ярыс уйгынланып оьтти. Шара Уллы Енъуьвдинъ 77-нши йыллыгына багысланып, Ногай район профсоюз организациясынынъ уйгынлавы ман оьтти.

Байрам шарада белгили болган согыс йылларынынъ, айтпага «Эх, дороги!», «Бессмертный полк», «Священная война» эм сондай баска йырлары йырландылар. Ис коллективлери бу ярысына йыр айырувда яваплы аьзирленгени, уьстине киеек кийимлерин терен ойлап сайлаганлары аян сезилди. Тоьрешилер ярыс катнасувшыларынынъ коьлем болып йырлавына, кийген кийимине, йырлав оьнершилигине баа бердилер. Согыс-патриот йырлары шарага йыйылган аьр кимнинъ де сезимлерин толкынластырдылар. Хор катнасувшылары оьз сезимлерин эм карасларын йырдынъ иш маьнеси мен байланыстырмага шалыстылар. Ярыс тамамы бойынша тоьрешилер ийги деген йыр коллективлерди белгиледилер. Оларга Сый грамоталары эм акша эсабында баргылар тапшырылды.
Соьйтип, Терекли-Мектеб авылынынъ Кадрия атындагы орта мектебининъ окытувшыларынынъ ис коллективи биринши орынды бийледи. Экинши орыны «Юлдыз» эм «Ногай Эл» балалар бавларынынъ эм Нариман авыл орта мектебининъ куллыкшыларына тийисли этилди.
3-нши орынды Эдиге, Куьнбатар, Карасу эм Терекли-Мектебтинъ А.Ш.Джанибеков атындагы орта мектеблерининъ эм Нариман авылынынъ «Шолпан» балалар бавынынь хор йырлавшы коллективлери бийледилер. Баска болып, байрам шарасында белсенли катнаскан баска педагоглар коллективлери де Сый грамоталары эм акшалай баргылары ман белгилендилер.
Соьйтип, шара йылы эм йогары коьнъилде озды.
Г.Нурдинова.
Суьвретте: шарадан коьринис.