Бала баьримизге де ортак. Биревге кыйынлык туьссе, аьр бир инсан коьмек этпеге аьзир экенине тагы да бир кере баьримиз де шайыт болдык. Сондай бир аьлге Ногай районынынъ яшавшысы туьскен болган – уьш ясындагы уныгы квартирадынъ ишинде киртленип калган. Хатын коьмек тилеп Ногай РЭС боьлигининъ етекшисине тел согады.

– Кыскаяклы тек 5 такыйкага уьйден шыккан, сол кишкей заманнынъ ишинде уныгы капыды киртлемеге уьлгиреди. Квартирадынъ терезеси ашык калган болган, бала соннан йыгылмага болады деп корккан тетеси, – деп айтады бу болган ис акында Ногай РЭС етекшиси Рамиль Муслимов.
Кашан да, «Сырт-Кавказ Россети» филиалынынъ энергетиклери тез аьрекетлеп сол уьйге бардылар. Специальли техника аркасы ман олар, экинши шарлакка коьтерилип, балады куткардылар эм капыды аштылар. РЭС бас инженери Камиль Буланбаев эм коьлик айдавшы Амирхан Эльмурзаев аьр бир керек ерге келип, ярдам этуьвди оьз борышы деп санайдылар, олар – буьгуьнги оьзгеристинъ баьтирлери.
Суьйинген кыскаяклы энергетиклерге тез аьрекетлеп эткен коьмеги уьшин савбол айтты. Биз де оьктемсиймиз ердеслеримиз бен, олар тек кеспи куллыгын этип калмай, яшавшыларга кол коьмегин де бередилер.
Г.Бекмуратова.
Суьвретте: К.Буланбаев куткарылган бала ман.